काठमाडौँ । विभिन्न जिल्लामा लागु गरिएको निषेधाज्ञा कार्यान्वयनको सिलसिलामा पछिल्लो २४ घण्टामा एक हजार ८०६ वटा सवारी साधन नियन्त्रणमा परेको छ । निषेधाज्ञा उल्लंघन गरेका सवारी साधनलाई प्रहरीले नियन्त्रण गरेको हो ।

तीमध्ये ९४२ वटा गाडी र ८६४ वटा मोटरसाइकल रहेका छन् । नियन्त्रणमा लिएका सवारी साधनलाई आवश्यक सोधपुछ पश्चात छोडिने गरिएको प्रहरीले जनाएको छ ।

साथै कोरोना भाइरस (कोभिड–१९) नयाँ भेरियन्टसहितको कोभिड संक्रमणको रोकथाम तथा जोखिम न्युनीकरणका लागि नेपाल प्रहरीद्वारा संचालित ‘तपाईंको मास्क खोई ?’ कार्यक्रमअन्तर्गत पछिल्लो २४ घण्टामा ९९२ जनालाई निःशुल्क मास्क वितरण गरिएको छ ।

३३१ जनालाई जरिवाना

कोभिड–१९ रोकथाम तथा नियन्त्रणका लागि स्वास्थ्य तथा जनसंख्या मन्त्रालयद्वारा तोकिएको मापदण्ड उल्लंघन गर्ने ३३१ जनालाई प्रचलित कानुन जरिवाना गरेको छ । उनीहरूको साथबाट ३३ हजार ५ सय रुपैयाँ जरिवाना असुल गरिएको छ । यस्तै, ३ हजार ७६६ जनालाई रोकेर सम्झाई बुझाई गरिएको छ ।

यस्तै, देशभर सञ्चालित ८९ वटा माइकिङ, प्लेकार्ड, पर्चा पम्प्लेटसहितको सचेतनामूलक कार्यक्रमअन्तर्गत ६ हजार ९१६ जनालाई सचेत गराइएको छ ।

निषेधाज्ञा कार्यान्वयनलाई थप प्रभावकारी र सफल बनाउन नेपाल प्रहरीले अन्य सुरक्षा निकायलगायतका सरोकारवालासँग आवश्यक समन्वय, सहकार्य गरी अनुगमनलाई समेत तीव्रता दिएको छ ।