काठमाडौं । कोरोना महामारीको दोस्रो लहर तीव्र रुपमा फैलिएको छ । गर्भावस्थामा कोरोना संक्रमित भएर होम आइसोलेसनमा बसेको अवस्थामा गर्भवतीले उचित ध्यान दिनुपर्ने चिकित्सकको सुझाव छ ।

परोपकार प्रसुति तथा स्त्री रोग अस्पतालका निर्देशक डा संगिता मिश्रा कोरोना संक्रमण देखिएका गर्भवतीलाई छुट्टै कोठामा बस्न र छुट्टै शौचालयको प्रयोग गर्न सुझाव दिन्छिन् ।

गर्भवतीले शरीरमा अक्सिजनको मात्रा चार/चार घन्टाको अन्तरमा नाप्नुपर्ने उनको सुझाव छ । त्यस्तै बेलाबेला ज्वरो जाँच गर्ने गर्नुपछ । यदि ज्वरो आएमा सिटामोल खान सकिने उनको भनाइ छ ।

उनका अनुसार अन्य हल्का खोकी लाग्यो भने स्वास्थ्यकर्मीको परार्मश लिनुपर्छ । फलफूल, तरकारी, दूध, माछामासु, अन्डालगायत पोषणयुक्त खानेकुरा प्रशस्त खानुपर्छ ।

डा मिश्राले भनिन्, ‘आइसोलेसनमा बस्दा श्वासप्रश्वासमा समस्या देखियो वा अत्यधिक ज्वरो आएमा, शरीरमा अक्सिजनको मात्रा घटेमा तुरुन्तै अस्पताल जानुपर्छ ।”

पेट दुखिरहेको छ वा पेटमा बच्चा कम चलेको छ । तल्लो पेट दुखिरहेको तथा रगत बगिरहेको अवस्था भए भने तुरुन्तै अस्पताल जान उनले सुझाइन् ।