काठमाडौं । पूर्व प्रधानमन्त्री माधव नेपालले एमालेभित्रको विवाद मिलाउन वार्ता गरे पनि बालुवाटारको बालुवा पेलेर तेल निस्कन नसक्ने बताएका छन् । आफू निकटका समानान्तर जिल्ला कमिटीका पदाधिकारीहरूसँग शनिबार भर्चुअल अर्न्तक्रिया गर्दै वरिष्ठ नेता नेपालले प्रधानमन्त्री केपी ओलीसँग झुकेर वार्ता गर्ने र आत्मसमर्पण गर्ने पक्षमा आफू नरहेको बताएका हुन् ।

ओलीले वार्ताका नाममा अलमलाउने खेती मात्र गरिरहेको र कम्तीमा आफूलाई भने ओली अब सच्चिएर आउँछन भन्ने नलागेको बताएका हुन् । यद्यपि, उनले पार्टीको केन्द्रीय सदस्यहरूले दिएको सुझावका आधारमा स्थायी समिति बैठक बसेर आफ्नो विचार समूहको ठोस धारणा अगाडि सार्ने र सार्वजनिक गर्ने बताएका छन् ।

जिल्लाका पदाधिकारीहरूसँगको छलफलपछि अहिले नेता नेपाल समूहको स्थायी समितिको बैठक बसिरहेको छ । बैठकपछि यो समूहले सामूहिक रुपमा एउटा वक्तब्य दिने तयारी गरेको छ ।

‘उहाँ (माधव कमरेड)ले हामीसँग सुझाव माग्नुभयो, उहाँले पछिल्लो राजनीतिक घटनाक्रमका बारेमा विफ्रिङ गर्नुभयो,’ नेपाल समूहका एक जिल्ला अध्यक्षले मेरोन्यूजसँगको कुराकानीका क्रममा भने, ‘अहिले हामीसँगको छलफलपछि माधव कमरेड र अरु स्थायी समितिका कमरेडहरू बैठकमा बस्नु भएको छ । बैठकपछि केन्द्रीय समितिको बिहीबार र शुक्रबार बसेको बैठकपछिको धारणा प्रेस वक्तब्य दिएर सार्वजनिक गर्नुहुन्छ ।’

जिल्लाका पदाधिकारीहरूसँग भने नेता नेपाल मात्रै भर्चुअल बैठकमा सहभागी थिए । भर्चुअल बैठकमा २०३ जना सहभागी थिए । जसमध्ये शनिबार ३० जना जिल्लाका पदाधिकारीहरूले आफ्नो सुझावसहितको धारणा राखेका छन् । नेपाल समूहका ती जिल्ला अध्यक्षले भने, ‘अधिकांश जिल्ला पदाधिकारीहरूले सुझाव दिने क्रममा वार्ता सँगसँगै नयाँ पार्टी पुनर्गठनलाई पनि सँगसँगै अगाडि लैजानु पर्ने सुझाव दिनुभएको छ ।’

नेता नेपालले आफू कमजोर हुँदा ओलीले झुल्याउने गरेको र अहिले पनि वार्ताका नाममा झुक्याउने प्रयासमा लागेकाले आफूलाई अब ओली सच्चिएर आउलान् भन्ने नै लाग्न छोडेको बताएका थिए । यद्यपि, नेता नेपालले जिल्लाका पदाधिकारीहरूको सुझावकै आधारमा आफू अगाडि बढ्ने र त्यसका लागि खुलस्त सुझाव दिन जिल्लाका नेताहरुलाई आग्रह गरेका थिए ।

ओलीले एमालेभित्रको विवाद मिलाउन सर्वाेच्च अदालतमा नेपालसहितका नेपाल पक्षका नेताले हस्ताक्षर गरी दर्ता गरेको रिटबाट नाम फिर्ता लिन गरेको आग्रह स्वीकार्य हुन नसक्ने नेता नेपालको भनाई थियो । उनले संसद भंग गरेर ओलीले प्रतिगमन भाग दुई चालेको बताएका थिए । उनले ओलीले मन्त्री मण्डल पुनर्गठन गर्दा नै भारतसँगको सम्बन्ध कुन हदमा लैजान चाहेको भन्ने प्रमाणित भएको पनि बताएका थिए ।
‘तपाईहरूले देखिहाल्नुभएको छ, ओलीले कस्ता मान्छेलाई समेटेर मन्त्री मण्डल बनाएका छन्, यसले पनि देखाउँछ, ओली भारतसँगको भक्तिभावमा कति सम्म लागेका छन भन्ने,’ नेता नेपालले भनेका थिए ।

नेपालले अब वार्ताका नाममा धेरै समय अल्झिनेतिर जान नहुने भन्दै एउटा स्टेप चाल्नै पर्ने अवस्थामा आफूहरू आइपुगेको पनि बताएको ती नेताले बताए ।

नेपालले भने, ‘माझीहरूको सल्लाहले डुंगा पल्टेजस्तै नहोस् । मरिसकेपछि डाक्टर बोलाउनुको कुनै अर्थ हुन्न । अब के गर्ने छिटो गर्नुपर्छ ।’
नेता नेपालले समानान्तर संरचना गाउ र टोलसम्मै विस्तार गरेर लाग्न पनि निर्देशन दिएका थिए । ‘ओलीसँग मिल्ने देखिन्न, हामीले विद्रोहको विगुल फुकिसकेका छौँ, तपाईहरूले गाउँ टोलसम्मै समानान्तर संरचना घनीभूत रुपमा बनाउनुस्,’ नेपालले भने ।