काठमाडौँ । महानगरीय प्रहरी वृत्त सोह्रखुट्टेका प्रहरी नायब उपरीक्षक (डीएसपी) दीपक खड्का कारबाहीमा परेसँगै उनको जिम्मेवारी खोसिएको छ ।

कार्यक्षमता कमजोर एवं आर्थिक प्रलोभनमा परेर काम गरेको देखिएपछि उनलाई आइतबार महानगरीय प्रहरी परिसर काठमाडौँ टेकु तानिएको हो ।

महामारीको बेला पनि पैसा लिएर ठमेलका क्लब बारहरू सञ्चालन गर्न दिएको गुनासोपछि उनीमाथि छानबिन गर्नुपर्ने भन्दै परिसर काठमाडौँले खड्कालाई जिम्मेवारीबाट हटाएको परिसरका एसपी रमेश बस्नेतले बताए ।

खड्कालाई विभागीय कारबाही गर्नुको साथै सोह्रखुट्टे वृत्त प्रमुखबाट हटाइएको हो । उनी आइतबारदेखि नै महानगरीय प्रहरी परिसर टेकु हाजिर भएका छन् । खड्का १६ महिनादेखि साह्रखुट्टे वृत्त प्रमुख थिए ।

अहिले महानगरीय प्रहरी वृत्त सोह्रखुट्टेमा खड्काको ठाउँमा कसैलाई पठाइएको छैन ।