काठमाडौँ । नवनियुक्त ऊर्जा, जलस्रोत तथा सिँचाई मन्त्री शरतसिंह भण्डारीले ‘समृद्ध नेपाल, सुखी नेपाली’को आकांक्षालाई सफल पार्न ध्यान दिने बताएका छन् । यस्तै, उनले आइतबार आफ्नो कार्यभार सम्हाल्दै उनले आफूहरुले उठाएको माग र मुद्दालाई प्रधानमन्त्री केपी शर्मा ओलीले सम्बोधन गरेको बताए ।

आफूहरू सरकारमा सहभागी भएको उल्लेख गर्दै उनले भने, ‘प्रधानमन्त्री ओलीले लिनुभएको ‘समृद्ध नेपाल, सुखी नेपाली’लाई सफल पार्नको निम्ति सरकारमा आएको हुँ ।’

‘जनता समाजवादी पार्टी (जसपा) र नेकपा एमालेको सहकार्यमा बनेको सरकार छ, हामी सहकार्य गर्न आएका छौँ,’ उनले भने, ‘आज ओली नेतृत्वको सरकारले हाम्रो माग, मुद्दालाई सम्बोधन गरेर अगाडि बढेको र हामीलाई सहकार्य गर्न बाटो खुलेको छ ।’

उनले ऊर्जा मन्त्रालय मुलुकको आर्थिक क्रान्तिको मेरुदण्ड भएकाले मन्त्रालयका काम कारबाहीलाई चुस्त र प्रभावकारी हिसाबले अगाडि बढाउने बताए ।