काठमाडौँ । अमेरिकी उपराष्ट्रपति कमला ह्यारिस पहिलोपटक विदेश भ्रमणका सिलसिलामा ग्वाटेमाला पुगेकी छन् । ग्वाटेमालाको भ्रमणपछि उनी मेक्सिको प्रस्थान गर्ने भएकी छन् ।

अमेरिकी राष्ट्रपति जो बाइडेनकी विशेष दूतका रुपमा उपराष्ट्रपतिले ती दुई मुलुकको भ्रमण गर्न लागेकी हुन् । उनले सीमामा भइरहेको तस्करी नियन्त्रण र भ्रष्टाचार नियन्त्रणका उपायबारे अमेरिकी धारणा सार्वजनिक गर्ने छिन् ।

राष्ट्रपति बाइडेनले उपराष्ट्रपतिलाई अमेरिका–मेक्सिको सीमामा उत्पन्न आप्रवासनका ठोस कारणहरु पत्ता लगाई त्यसको निराकरणका उपाय पहिल्याउन विशेष जिम्मेवारी दिएका छन् । उपराष्ट्रपतिका सल्लाहकार टोलीका अनुसार ग्वाटेमालाका राष्ट्रपति अलेज्यान्ड्रो जियामाट्टीसँग सोमबार तथा मेक्सिकोका राष्ट्रपति आन्द्रेस मेनुअल लोपेज ओब्राडोरसँग मंगलबार हुने बैठकमा भ्रष्टाचार नियन्त्रणका उपायका बारेमा छलफल हुने छ ।

उपराष्ट्रपति आइतबार अबेर ग्वाटेमाला सिटी पुगेकी हुन् । उनलाई ग्वाटेमालाका विदेश मन्त्री पेड्रो ब्रोलोले स्वागत गरेका थिए ।

भ्रमणका क्रममा उनले कोभिड–१९ विरुद्धको खोप उपलब्ध गराउने बारेमा पनि छलफल गर्नु हुनेछ । अमेरिकाले ग्वाटेमालालाई पाँच लाख तथा मेक्सिकोलाई १० लाख डोज खोप दिने घोषणा गरिसकेको छ ।