काठामाडौँ । जिल्ला प्रशासन कार्यालय सुर्खेतले राउटे समुदायको बस्तीलाई सिल गरेको छ । राउटे युवतीमाथि यौन दुर्व्यवहार भएको भिडियो राउटे समुदायमा पुग्न नदिन बस्ती सिल गरेको जिल्ला प्रहरी कार्यालय सुर्खेतले जनाएको हो ।

‘पछिल्लो घटनासँगै राउटे बस्तीमा चहलपहल बढ्दा भिडियो उक्त समुदायमा पुग्न भएपछि अनाधिकृत व्यक्तिहरुलाई बस्तीमा जान रोक लगाएका छौँ,’ जिल्ला प्रहरीका डिएसपी रामप्रसाद घर्तीले भने ।

उनका अनुसार बस्तीलाई सुरक्षा दिनका लागि २२ जना प्रहरी खटाइएको छ । फिरन्ते जीवन बिताउँदै आएका राउटे समुदाय हाल सुर्खेतको गुर्भाकोट नगरपालिका ११ स्थित भेरी नदी किनारमा बस्दै आएका छन् ।

घटनाबारे जानकारी पाए पीडित युवतीलाई राउटे समुदायले नै अस्वीकार गरी समूदायभित्रै कडा सजाय दिन सक्ने भन्दै प्रहरीले बस्तीलाई सिल गरेको हो । डिएपसी घर्तीका अनुसार सोमबार बिहानैदेखि राउटे बस्तीको सुरक्षाका लागि प्रहरीलाई खटाइएको हो ।

आइतबार राउटे मुखिया सूर्यनारायण शाहीले अन्य समुदायका नागरिक आएर आफ्ना जनतालाई दुःख दिएको भन्दै सुरक्षा व्यवस्था गरिदिन माग गरेका थिए ।