काठमाडौँ । महोत्तरीमा घरमा भएको मूर्तिलाई लिएर झगडा हुँदा भाइको मृत्यु भएको छ । महोत्तरीको लोहरपट्टी गाउँपालिकास्थित भ्रमरपुरामा दाजुभाइबीच झगडा हुँदा भाइ लक्ष्मणको मृत्यु भएको प्रहरीले जानकारी दिएको हो ।

अंशबण्डा भएको लामो समयपछि दुई भाइबीच घर देउतालाई लिएर कुटपिट हुँदै आएको थियो । तर, शुक्रबार ५० वर्षीय दाइ रामचन्द्र साहसहित परिवारले घरमा एक्लै रहेका ४५ वर्षीय भाइलाई कुटपिट गरी गम्भीर घाइते बनाएको प्रहरीले जनाएको छ ।

गम्भीर घाइते भएका लक्ष्मणको उपचारका क्रममा मृत्यु भएको महोत्तरीका प्रहरी उपरीक्षक दिनेश आचार्यले जानकारी दिए ।

भाइको मृत्युपछि दाइसहित उनका परिवार फरार छन् भने दुई जनालाई प्रहरीले पक्राउ गरिसकेको छ । उनीहरूको खोजी कार्य भइरहेको प्रहरीले जनाएको छ ।