काठमाडौँ । बागमती प्रदेश सरकारको आगामी आर्थिक वर्ष २०७८–०७९ को नीति तथा कार्यक्रम बहुमतले पारित गरेको छ । बिहीबार प्रदेशका प्रदेश प्रमुख विष्णुप्रसाद प्रसाईले प्रदेशसभामा प्रस्तुत गरेको नीति तथा कार्यक्रममा शुक्रबार र शनिबार दुई दिन छलफल भएको थियो । छलफलमा ४५ जना सांसद सहभागी भएका थिए ।

नेकपा माओवादी केन्द्रसहित प्रतिपक्ष दलले सरकारले पुरानै कार्यक्रमलाई निरन्तरता दिएर हावामा नीति तथा कार्यक्रम ल्याएको आरोप लगाएको छ ।

सांसदहरूले उठाएका प्रश्नमा बागमती प्रदेशका मुख्यमन्त्री डोरमणि पौडेलले जवाफ दिएका थिए । उनले प्रदेश सरकारले प्रदेशका नागरिकलाई केन्द्रमा राखेर कोरोना नियन्त्रण, उपचार र खोपको सुनिश्चितता हुने गरी नीति तथा कार्यक्रम ल्याएको बताए ।

सांसदहरुले पेश गरेको नीति तथा कार्यक्रममाथिको संशोधन प्रस्ताव बहुमतले अस्वीकृत गरेपछि प्रदेशसभाका सभामुख सानुकुमार श्रेष्ठले नीति तथा कार्यक्रमलाई स्वीकृतिका लागी संसद्मा पेश गरेको थिए । सभामुख श्रेष्ठले स्वीकृतिका लागि प्रस्तुत गरेको सरकारको उक्त नीति तथा कार्यक्रम बहुमतले स्वीकृत गरेको हो ।

बैठक आगामी असार १ गते ३ बजेसम्मका लागि स्थगित भएको छ ।