काठमाडाैं । पाँच पूर्वप्रधानमन्त्रीहरूले प्रधानमन्त्री केपी शर्मा ओलीकाे गलत कृत्यमा संलग्न नहुन राज्यसंयन्त्रलाई चेतावनी दिएका छन् ।

पूर्वप्रधानमन्त्री शेरबहादुर देउवा, पुष्पकलम दाहाल (प्रचण्ड), मावधुमार नेपाल, झलनाथ खनाल र डा बाबुराम भट्टराईले आज संयुक्त वक्तव्य जारी गर्दै ओलीका विवादास्पत तथा जनविराेधी कामलाई राज्य संयन्त्रले मुकदर्शक भएर हेरेकाे भन्दै उनीहरूले काम चलाउ सरकारका निर्णयकाे प्रतिकार गर्न उनीहरूले सचेत गराएका हुन् ।

उनीहरूले संवैधानिक व्यवस्था, कानूनी राज्य र लोकतन्त्रका आधारभूत सिद्धान्त एवं मूल्यमाथि भइरहेको निरंकुश हमलाका विरुद्ध ऐक्यवद्धता जनाउन नेपाली जनता, नागरिक समाज र सम्पूर्ण लोकतन्त्रवादी शक्तिसँग अपिल गरेका छन् ।

‘काम चलाउ स्थितिमा रहेको सरकारबाट देश र जनतालाई असर पार्ने गरी दीर्घकालीन प्रकृतिका काम नगर्न र नगराउन चेतावनी दिँदै यसप्रकारमा गलत काममा संलग्न नहुन प्रशासन र सुरक्षा निकाय लगायत राज्यका अन्य निकायहरुलाई समेत आग्रह गर्दछौं’, वक्तव्यमा भनिएकाे छ ।

प्रधानमन्त्रीका गलत क्रियाकलापका कारण देशले अस्थिर र अन्योल ग्रस्त राजनीतिक स्थितिको सामना गरिरहेको बेला काम चलाउ सरकारले घाटा बजेट पूर्ति गर्ने निहुँमा देशका विभिन्न भागबाट ढुंगा, वालुवा र गिटी उत्खनन् गरी विदेशमा निकासी गर्ने राष्ट्रहित र जनविरोधी निर्णय गरेको भन्दै उनीहरूले उक्त निर्णय तत्काल फिर्ता लिन माग गरेका छन् । ‘आफ्नो घरमा आगो लगाएर अरुको हितका लागि खरानी बेच्ने जस्तो सरकारको उक्त निर्णयको तीब्र विरोध गर्दै तत्काल त्यस्तो निर्णय खारेज गर्न माग गर्दछौं’, उनीहरूले भनेका छन् ।