काठमाडौँ । विद्यालयहरूले आगामी असार २० गतेभित्र विद्यालय शिक्षा परीक्षा (एसईई)को मूल्यांकन नतिजा पठाउनु पर्ने भएको छ । सम्बन्धित जिल्लाको शिक्षा विकास समन्वय इकाईमा मूल्यांकन पठाउनु पर्ने भएको हो ।

राष्ट्रिय परीक्षा बोर्डले ‘कक्षा १० को विद्यार्थी मूल्यांकन कार्यविधि, २०७८’ तयार गरी परीक्षा सार्वजनिक गर्ने भएपछि विद्यालयले विद्यार्थीको मूल्यांकन पठाउनु पर्ने भएको हो । यस्तै, इकाईले असारभित्र राष्ट्रिय परीक्षा बोर्डमा विद्यार्थीको मूल्यांकन पठाउनु पर्ने नियम बनाएको हो ।

भौतिक रुपमा एसईई परीक्षा हुन नसकेपछि बोर्डले यस वर्ष नतिजा मूल्यांकनको आधारमा सार्वजनिक गर्ने निर्णय गरेको हो । नयाँ कार्य विधिअनुसार एसईईमा विद्यार्थीको मूल्यांकनको मुख्य अधिकार विषय शिक्षकलाई दिएको छ ।