काठमाडौँ । गत जेठ १५ गते प्रस्तुत भएको बजेट भाषणमा अर्थ मन्त्री विष्णु पौडेलले आन्तरिक पर्यटनको विकास गर्न निजामती कर्मचारीहरूलाई तलबसहित १० दिन भ्रमण गर्न दिने बताएका थिए । तर, ती कर्मचारीले भ्रमणका लागि आफ्नो गृह जिल्ला र ससुराली वा माइती जिल्ला रोज्न नपाउने भएका थिए ।

सरकारले निजामती कर्मचारीलाई लक्षित गरी ल्याइएको यस सुविधा शिक्षक र प्राध्यापकलाई भने समेट्न सकेको थिएन् । जसलाई नेपाली कांग्रेसले निजामती कर्मचारीका लागि मात्र दिइएको यस प्रकारको सुविधा शिक्षक र प्राध्यापकलाई पनि दिन आग्रह गरेको छ ।

कांग्रेस शिक्षा विभागका सचिव डा कृष्णप्रसाद रिजालले सोमबार विज्ञप्ति जारी गर्दै सरकारले बजेटमार्फत् निजामती कर्मचारीको लागि मात्र दिएको उक्त सुविधा शिक्षक र
प्राध्यापकलाई पनि दिनु पर्ने माग राखेको हो ।

‘अध्यादेशमार्फत् ल्याइएको आर्थिक वर्ष २०७८/७९ को बजेटमा निजामती सार्वजनिक संस्थान र प्रतिष्ठानका कर्मचारीलाई प्रदान गरिने सेवा तथा सुविधामा शिक्षक र प्राध्यापकलाई विभेद गरेको छ । निजामती कर्मचारीलाई १० लाखको सामूहिक दुर्घटना बिमा र एक लाख रूपैयाँको स्वास्थ्य बिमा प्रिमियम बापतको रकम नेपाल सरकारे व्यहोर्ने निर्णय गरे पनि सोबाट समेत शिक्षक र प्राध्यापकलाई बञ्चित गरिएकोमा विभाग खेद प्रकट गर्दछ,’ विज्ञप्तिमा भनिएको छ ।