काठमाडौँ । पछिल्लो समय शेयर कारोबारमा देखिएको सुधारमा आज सोमबार नयाँ रेकर्ड कायम भएको नेपाल स्टक एक्सचञ्जले जनाएको छ ।

साताको दोस्रो कारोबार हुने दिन सोमाबर शेयर कारोबार मापक नेप्से परिसूचक ३ हजार २५ रुपैयाँ ८२ पैसामा पुगेर नयाँ रेकर्ड कायम भएको हो ।

यसअघि आइतबारमात्रै २ हजार ९ सय ८३ मा पुगेर नयाँ रेकर्ड कायम भएको थियो । स्टक एक्सचेञ्जका अनुसार कारोबार खुलेको केही मिनेटमा नै बजार परिसूचक उच्च अंकले वृद्धि भएकोले समग्र मापकमा उल्लेख्य सुधार देखिएको हो । १ घण्टाको कारोबारमा ५४ दशमलब ९९ अंकले बढ्दै ३०३८ दशमलब १ बिन्दुमा शेयर कारोबार पुगेको थियो ।

कारोबार हुने अन्तिम समयमा बजार परिसुचक ४२ दशमलब ७२ अंकले सुधार आएको छ । १ घण्टामा ४ अर्ब ४८ करोड रुपैयाँको कारोबार भएकोमा कारोबार बन्द हुँदा अघिल्लो दिनको तुलनामा १ दशमलब ४३ प्रतिशतले वृद्धि भई १८ अर्ब ८८ करोड ४० लाख ३१ हजार ५ सय १९ रुपैयाँ बराबरका ३ करोड ५० लाख २७ हजार ३ सय ३६ कित्ता शेयर किनबेच भएको स्टक एक्सचेञ्जको मापकमा उल्लेख छ ।

पछिल्लो समय अनलाइन कारोबारमा भएको सहजता र लगानीकर्ताहरुको आकर्षणले बजारमा नयाँ रेकर्ड कायम भएको नेपाल स्टक एक्सचेञ्जले दाबी छ ।