काठमाडौं । माओवादी केन्द्रका नेता नारायणकाजी श्रेष्ठले निर्वाचन आयोग सरकारको कठपुतली बनेको आरोप लगाएका छन् । उनले आयोगले सम्वैधानिक अंगको दायित्व पूरा नगरी सरकारको कठपुतली भई कानुन र लोकतन्त्रको धज्जी उडाउने काम गरेको आरोप लगाएका हुन् ।

जसपाको बहुमत कार्यकारिणी समितिको निर्णयलाई आयोगले बैधानिकता नदिएको र नेकपाकै शैलीमा आयोगले जसपाका बारेमा पनि निर्णय लिएको भन्दै आयोगको निश्पक्षतामै नेता श्रेष्ठले प्रश्न उठाएका हुन् ।

अहिलेको राजनीतिक अस्थिरता र संकटको कारण आयोग सरकारको कठपुतली बन्नु् पनि एउटा कारण भएको भन्दै श्रेष्ठले राजनीतिक पार्टीहरुले आफ्नो प्रत्यक्ष स्वार्थ वा हितसँग नजोडिदासम्म नबोल्ने वा तमासे बन्ने स्थिति अन्त्य गर्नुपर्ने बताएका छन् ।

उनले लोकतन्त्र पक्षधर सबै मिलेर संवैधानिक अङ्गको त्यसप्रकारको गलत कार्यलाई समयमै रोक्नुपर्ने पनि बताएका छन्

‘निर्वाचन आयोग सरकारको कठपुतली भई कानुन र लोकतन्त्रको धज्जी उडाउने काम गरिरहेछ। संवैधानिक आयोगको यस्तो कार्य लज्जास्पद र भर्त्सनायोग्य छ।जसपा बारेको पछिल्लो निर्णयमा यो स्पष्ट भएको छ।नेकपाको बारेमा पनि यस्तै गरिएको थियो । अहिलेको राजनीतिक अस्थिरता र संकटको कारण त्यो पनि पनि हो,’ श्रेष्ठले सामाजिक सन्जलमार्फत भनेका छन्,-‘राजनीतिक पार्टीहरुले पनि आफ्नो प्रत्यक्ष स्वार्थ वा हितसँग नजोडिदासम्म नबोल्ने वा तमासे बन्ने स्थिति अन्त्य गर्नुपर्छ ।लोकतन्त्र पक्षधर सबै मिलेर संवैधानिक अङ्गको यसप्रकारको गलत कार्यलाई समयमै रोकिहाल्नु पर्छ।