काठमाडौँ । विभिन्न राजनैतिक मुद्दा बोकेर राजनीतिक दलहरू निर्वाचन आयोग पुगेका छन् । आज शुक्रबार सत्तारुढ दल नेकपा एमाले बनेको पूर्व माओवादीका नेताहरू, नेकपा माओवादी केन्द्रका नेताहरू र जनता समाजवादी पार्टी (जसपा) निर्वाचन आयोग पुगेका हुन् ।

माओवादी छाडेर एमाले बनेका नेताहरू निर्वाचन आयोग पुगेर आगामी निर्वाचनबारे आयोग पदाधिकारीसँग छलफल गरेका थिए । सरकारले आगामी कार्तिक २६ गते र मंसिर ३ गतेका लागि दुई चरणमा निर्वाचन मिति तोकेको छ ।

यस्तै, माओवादीका नेताहरूले स्थानीय तहमा आफ्नो पार्टी छाडेर अरू दलमा समावेश भएका नेता तथा जनप्रतिनिधिहरूको नामावली प्रकाशित गरिदिन आयोग पुगेको हो ।

माओवादी छाडेर एमाले बनेका पूर्वमन्त्री टोपबहादुर रायमाझी र प्रभु शाहलगायत नेताहरू आयोग पुगेका थिए । उनीहरूले आयोग पदाधिकारीसँग निर्वाचनका बारेमा छलफल गरेका हुन् ।

उनीहरू आयोगबाट बाहिरिएसँगै माओवादी केन्द्रका नेता लीलामणि पोखरेल र दिनानाथ शर्मालगायत नेताहरू आयोग पुगेका थिए । उनीहरूले माओवादी छाडेकाहरूको नामावली सार्वजनिक गर्नबारे आयोग पदाधिकारीसँग छलफल गरेका हुन् ।

स्थानीय तहमा पार्टी छोडेर अन्यत्र गएकाहरुलाई पार्टीले कारबाही गरे पनि आयोगले सुचना जारी नगरेसम्म पद खाली नहुने व्यवस्था रहेको छ । माओवादी नेता लिलामणि पोखरेलले माओवादी केन्द्रबाट स्थानीय निर्वाचन जितेका मेयर उपमेयर र वडाध्यक्षहरू अरु पार्टीमा लागेको बताए ।

एमाले र माओवादीका नेता आयोगबाट निस्केलगत्तै जसपाका अध्यक्ष उपेन्द्र यादवसहितका नेताहरू आयोग पुगेका थिए । पार्टीभित्र देखिएको विवाद समाधान नहुने भएपछि उनी पार्टीको आधिकारिकता दाबी गर्न आयोग पुगेका हुन् । यस्तै, उनले जसपाका अर्का अध्यक्ष महन्थ ठाकुर पक्षलाई गरेको कारबाही अनुमोदनबारे समेत आयोगका पदाधिकारीसँग छलफल गरेका थिए ।