काठमाडौं । नेपाली कांग्रेसका सभापति शेरबहादुर देउवाले आज पनि पार्टीको १४ औं महाधिवेशनबारे आफूपक्षीय नेताहरूसँग छलफल गर्दैछन् ।

आगामी भदौ १६ देखि १९ गतेसम्म महाधिवेशनको मिति तय गरेपछि देउवाले शनिबारबाट आफूपक्ष्ीय नेताहरूसँग प्रदेशवाइज छलफल गरिरहेका छन् ।

शनिबार प्रदेश–१ र प्रदेश–२ का नेताहरूसँग छलफल गरेका देउवाले आज बागमती र गण्डकीका नेताहरूसँग छलफल गर्न लागेका हुन् ।

हिजोका दुई छलफलमा देउवाले आफू सभापतिमा दोहोरिन चाहेकाले सहयोग गर्न नेताहरूलाई आग्रह गरेका थिए । आज पनि नेताहरूसँग सहयोगका लागि आग्रह गर्ने उनको सचिवालयले जनाएको छ ।

पहिला बागमतीमा आफ्नो समूहका केन्द्रीय सदस्यहरू र त्यसपछि गण्डकीका केन्द्रीय सदस्यहरूसँग छलफल गर्न भन्दै बोलाएका छन् ।

केन्द्रीय सदस्य मोहनबहादुर बस्नेतले बिहान १० बजे सभापति देउवाले छलफलका लागि बुढानीलकण्ठस्थित निवासमा बोलाएको जानकारी दिए । देउवाको सचिवालयका अनुसार त्यसपछि गण्डकीका नेताहरूसँग छलफल गर्ने कार्यक्रम देउवाको छ ।