कैलाली । धनगढी उपमहानगरपालिकाले आर्थिक वर्ष २०७८/०७९ को लागि रु एक अर्व ८१ करोड २८ लाख २२ हजारको बजेट सातौ नगरसभामा पेश गरेको छ । आज धनगढीमा आयोजित उपमहानगरपालिकाको सातौं नगरसभामा उपप्रमुख सुशिला मिश्र भट्टले उक्त बजेट पेश गरे ।

जसमध्ये चालुतर्फ रु एक अर्ब दुई करोड ८० लाख ७० हजार र पुँजीगत तर्फ रु ७८ करोड ४७ लाख ५१ हजार रहेको छ । बजेट तथा कार्यक्रमले कोभिड– १९ बाट सृजित समस्या व्यवस्थापन, स्वास्थ्य, सरसफाइ र विपद् व्यवस्थापन, स्वास्थ्य तथा मानव सामथ्र्य विकास, कृषि उत्पादन र उत्पादकत्व अभिवृद्धि, शिक्षा तथा रोजगारी, पूर्वाधार निर्माण तथा दीगो विकास, सूचना प्रविधि तथा सञ्चारमा विकास लगायतका क्षेत्रलाई प्राथमिकतामा राखेको बताइएको छ ।

कृषितर्फ किसानलाई प्रोत्साहन गर्न किसान क्रेडिट कार्यको व्यवस्था गर्ने, सामुदायिक वनमा जडिबुटी खेती, कृषक पहिचान तथा परिचयपत्र, कृषि बजार मूल्य सूचना प्रणालीको व्यवस्था गरिने नीति लिएको छ । पर्यटन विकास तर्फ कैलाली नाला, सुकुटी नाला, मोहना नदी किनारमा साईकल ट्रयाक निर्माण गर्ने, तालतलैयाहरुको विकास, संरक्षण तथा पर्यटन प्रवर्द्धनका लागि काम गर्ने, भादागाउँ होमस्टेको प्रवर्द्धन गर्नेलगायत कार्यक्रम रहेका छन् ।

सामाजिक विकासतर्फ वालबालिका किशोर किशोरीसँग उपमेयर कार्यक्रम, मेयर, उपमेयर कल्याणकारी छात्रवृत्ति, उत्कृष्ट शिक्षक सम्मान, बालविकास शिक्षक, सामुदायिक सिकाई केन्द्रका कर्मचारीलाई केन्द्रले तोकेको तलबमा अपुग रकम थप गर्ने नीति लिएको छ । त्यसैगरी, पूर्वाधार, स्वास्थ्य, सुशासन तथा संस्थागत विकास, कानूनी मामिला तथा न्यायिक निरुपण लगायतका क्षेत्रहरुलाई समेट्ने गरी नीति तर्जुमा गरेको छ ।

नगरप्रमुख नृपबहादुर वडले सीमित स्रोत साधनका बीच सबै क्षेत्रलाई समेटेर नीति, कार्यक्रम तथा बजेट ल्याएको जानकारी दिए । उनले समेट्न नसकेका बिषय छलफल मार्फत समेटेर लैजाने बताए । उपप्रमुख भट्टले निकै मेहनतसाथ स्थानीय तहले अवलम्वन गर्ने सबै प्रक्रिया पुरा गरेर नगरवासीका मागलाई स्रोत साधनले भ्याएसम्म समेट्ने प्रयत्न गरिएको बताए ।