काठमाडौं । सशस्त्रका सशस्त्र प्रहरी नायब महानिरीक्षक (डीआईजी) प्रवीणकुमार श्रेष्ठको सेवा अवधि एक वर्ष थप भएको छ । सोमबार बसेको मन्त्रिपरिषद् बैठकले नम्बर ७ बाहिनीका बाहिनीपति श्रेष्ठको सेवाअवधि एक वर्ष थप गर्ने निर्णय गरेको हो ।

मन्त्रिपरिषद्को वैठकमा छलफल भएता पनि निर्णय गरेको थिएन तर आज दिनभरिको रस्साकस्सि र दौढधुपपछि उनको एकवर्ष थप गर्ने निर्णय गरेको स्रोतले मेरोन्यूजलाई जानकारी दियाे । सशस्त्र प्रहरी नियमावली, २०७२ को खण्ड ६४ को नियम २ को उपनियम १ मा एआईजी र डीआईजीको पदावधि एक वर्ष थप्न सकिने उल्लेख छ ।

सोही व्यवस्थाअनुसार सरकारले डीआईजी श्रेष्ठको सेवाअवधि एक वर्ष थप गरेको हो । सशस्त्र प्रहरी नियमावली २०७२ अनुसार सशस्त्र प्रहरीमा एआईजी र डीआईजीको पदावधि चाररचार वर्ष तोकिएको छ । सोही प्रावधानअनुसार श्रेष्ठ डीआईजी भएको मंगलबार (आज) राति १२ बजे चार वर्ष पूरा भएर अनिवार्य अवकासमा जाँदै थिए ।

उनको अवधि थप गरेपछि अब श्रेष्ठ सशस्त्र प्रहरी बलको नेतृत्वमा पुग्ने बाटो खुलेको छ । हालका सशस्त्र प्रहरी प्रमुख शैलेन्द्र खनाल आगामी चैत्र २८ मा अनिवार्य अवकाशमा जाँदै छन् । त्यसपछि करिब एक महिनाका लागि हालका एआइजी पुष्पराम केसी सशस्त्र प्रहरी महानिरीक्षक बन्ने छन् । केसीलगत्तै वरियताका आधारमा डिआइजी श्रेष्ठ एआइजी बन्ने छन् ।

यसअघि डिआइजीहरू खड्क राई र मन्दिप श्रेष्ठको समेत पदावधि एक वर्षका लागि थप गरिएको थियो । उनीहरू दुवै जनाको ५ वर्षे पदावधि आगामी माघमा सकिँदै छ । त्यति बेलासम्म एआइजी रिक्त नहुने भए पनि उनीहरू दुवै जनाले डिआइजीबाटै अवकाश पाउने छन् । डिआइजीमा उनीपछि रहेका राजु अर्याल र नारायणदत्त पौडेल पनि एआइजी बन्ने दौडमा छन् ।

श्रेष्ठ एआइजीमा बढुवा हुँदा एक नम्बरमा बढुवा भए उनको सशस्त्र प्रहरी महानिरीक्षक बन्ने सम्भावना बलियो छ । २७ कात्तिक २०५२ मा प्रहरी सेवामा प्रवेश गरेका उनी पछि सशस्त्र प्रहरी बल गठन भएपछि सशस्त्र प्रहरी बलमा प्रवेश गरेका थिए । श्रेष्ठ यसअघि सशस्त्र प्रहरीको प्रवक्तासमेत बनेका थिए । यसअधि सरकारले डीआईजीद्वय खड्क राई र मन्दीप श्रेष्ठको कार्यकालसमेत एकरएक वर्ष थप गरेको थियो ।