काठमाडौं । बुधबार टीकापुर नगरपालिका–४ बागमारास्थित जमरा कुलोको किनारमा मृत अवस्थामा फेला परेका कैलालीको टिकापुर नगरपालिका १ का साढे तीन वर्षीय बालकको आफ्नै दिदी नाता पर्नेले हत्या गरेको प्रहरीले जनाएको छ ।

गत सोमबारदेखि वेपत्ता रहेका बालक बुधबार मृत अवस्थामा फेला परेका थिए । बालकलाई पारिवारीक रिसिबीका कारण आफ्नै दिदी पर्ने १५ वर्षीय किशोरीले हत्या गरेको जिल्ला प्रहरी कार्यालय कैलालीले जनाएको छ ।

पारीवारीक रिसिबी र डाहाका कारण आरोपी १५ वर्षीय किशोरीले बालकलाई मार्ने योजना बनाई जामुन खाने निहुँमा जमरा कुलोको डिलबाट धकेलेर हत्या गरिएको जिल्ला प्रहरी कार्यालय कैलालीले जनाएको छ ।

आरोपी १५ वर्षीय किशोरीले जामुन खाएर फर्किने बेला उनलाई सडकमै छोडेर साथीको घर गएको तर फर्किनेबेला त्यहाँ नभेटेको किशोरीले बताउँदै आएकी थिइन् । प्रहरीले उनीमाथी निगरानी राख्दै आएको थियो ।

बालकले खुट्टामा लगाएको चाँदीको बाला बजारमा लगेर बेच्न खोजेको खुल्न आएपछि उनलाई नियन्त्रणमा लिएर सोधपुछ गर्दा आफुले हत्या गरेको स्विकारेकी हुन् ।

जामुन खाने बाहनामा जमरा कुलोको किनारमा लगेर खुट्टाको बाला झिकेर धकालेको १५ वर्षीय अभियुक्त किशोरीले बयानमा बताएको प्रहरीले जानकारी दिएको छ । प्रहरीले १५ वर्षीय किशोरीसँगै अनुसन्धानमा संलग्न उनको १४ वर्षीय साथिलाई समेत नियन्त्रणमा लिई थप अनुसन्धान भईरहेको बताईएको छ ।

सोमबार दिदी नाता पर्ने १५ वर्षीया किशोरीसँग घर नजिकै जामुन खान गएका बेला बालक बेपत्ता भएपछि खोजीका लागि मृतक विष्टका बाबु दिलिप विष्टले प्रहरीमा निवेदन दिएका थिए ।

बालक हराएको सुचना प्राप्त हुनासाथ प्रदेश प्रहरी कार्यालय, जिल्ला प्रहरी कार्यालय, कैलाली र इलाका प्रहरी कार्यालय टिकापुरबाट खटिएको संयुक्त प्रहरी टोलीले बालको खोजी कार्य सुरु गरेको थियो ।

प्रहरीले मृतक बालकको शव बुधबार फेला पारेको थियो । प्रहरी घटनाको अनुसन्धानका लागि सुदुरपश्चिम प्रदेश कार्यालयबाट २ वटा स्निफडग र प्रहरीको विषेशज्ञ टोली खटाएको थियो ।