काठमाडौं । देशको विभिन्न स्थानमा गएको बाढी तथा पहिरोबाट भएको भौतिक क्षति वापत निर्जीवन कम्पनीहरुमा झन्डै २ अर्बको माग दाबी परेको छ । २० वटै निर्जीवन कम्पनीमा गरेर कुल १ अर्ब ९२ करोड ३ लाख ४८ हजार बराबरको माग दाबी परेको बीमा समितिले जनाएको छ ।
अविरल वर्षा सुरु भएपछि हिजो बिहिबार असार २४ गतेसम्मको अवधिमा सम्पति बीमा, मोटर बीमा, कृषि तथा पशुपन्छी बीमा, इन्जिनियरिङ बीमा, र विविध बिमा अन्तर्गत बिमितहरुबाट ३ सय ३१ वटा बीमाको माग दाबि परेको समितिका सूचना अधिकारी निर्मल अधिकारीले जानकारी दिए ।
अधिकारीका अनुसार कुल माग दावी मध्ये १ सय ४१ वटा सम्पति बीमाको बीमा मागदावी ६९ करोड ३६ लाख, ३३ वटा मोटर बीमाको मागदावी ४ करोड ७५ लाख, ५ वटा सामुन्द्रिक बीमाको १९ लाख ८१ हजार, ६ वटा कृषि बीमाको १ करोड ६२ लाख, ५ वटा पशु पन्क्षी बीमाको २ करोड ३८ लाख र विविध तर्फ २ वटा बीमाको १ करोड ५५ लाख निर्जीवन बीमा मागदाबी परेको हो ।
इन्जिनियरिङ बीमा तर्फ क्षति भएका १ सय ७ वटा निर्माणाधीन आयोजन बीमाको मागदावी ९० करोड ७ लाख, ८ वटा निर्माण सम्पन्न आयोजना बीमाको ११ करोड ७० लाख, १८ वटा हेभी इक्वेपमेन्ट बीमाको ८ करोड ८४ लाख र अन्य ६ वटा बीमाको १ करोड ५३ लाखको माग दावी परेको समितिले जानकारी दिएको हो ।