काठमाडौं । नेपाली कांग्रेसका संस्थापनइतर नेताको बैठक सकिएको छ । बैठकको संयोजन गरेका नेता अर्जुननरसिंह केसीले संस्थापनइतरबाट एक जना मात्रै सभापतिका उम्मेदवार उठाउने गरी सकारात्मक छलफल सुरु भएको जानकारी दिए ।

उनले भने, ‘सके पार्टीभित्रै नसके हाम्रो समूहभित्र एकता गराउन प्रयास गर्ने सहमति भएको छ । छलफल निरन्तर रहनेछ ।’ आजको छलफलबाट एकताको सम्भावना बढेकाे उनकाे भनाइ छ ।

कांग्रेसको सभापतिमा आकांक्षीबीच बैठक जारी

केसीको पहलमा काठमाडौँ बत्तीसपुतलीस्थित अनुपम फुडल्याण्डमा संस्थापनइतर पक्षका सभापतिका आकांक्षीहरूबीच पहिलो बैठक बसेको हो । बैठकमा वरिष्ठ नेता रामचन्द्र पौडेल, महामन्त्री डा शशांक कोइराला, पूर्वमहामन्त्रीद्वय प्रकाशमान सिंह र कृष्णप्रसाद सिटौला, पूर्वसहमहामन्त्री रामशरण महत र केन्द्रीय सदस्य डा शेखर कोइराला सहभागी थिए ।

आसन्न महाधिवेशनमा संस्थापनइतर समूहबाट एक जनाले मात्रै उम्मेदवारी दिनुपर्ने भन्दै नेता केसीले छलफल गराएका हुन् । संस्थापन पक्षबाट सभापतिका लागि शेरबहादुर देउवा र विमलेन्द्र निधि आकांक्षी छन् । कांग्रेसको १४ औँ महाधिवेशन आगामी भदौ १६ देखि १९ गतेसम्म हुँदै छ ।