काठमाडौं । नेकपा (माओवादी केन्द्र) को संसदीय दलको बैठकले प्रधानमन्त्री शेरवहादुर देउवालाई विश्वासको मत दिने औपचारिक निर्णय गरेको छ । सिंहदरवारस्थित दलको कार्यालयमा बसेको बैठकले त्यस्तो निर्णय गरेको माओवादी केन्द्रका नेता देवप्रसाद गुरुङले जानकारी दिए ।

‘हामीले काग्रेस सहित हामी पनि सहभागी सरकारको पक्षमा मतदान गर्ने औपचारिक निर्णय गरेका छौं,’ बैठकपछि माओवादी केन्द्रका संसदीय दलका सचेतक देव गुरुङले भने ।

प्रधानमन्त्री देउवाले आज देखि शुरु हुन लागेको संसदको अधिवेशनको दोस्रो शत्रमा विश्वासको मत लिने तयारी गरेका छन् । देउवा सर्वाेच्च अदालतले प्रतिनिधीसभा पूर्नस्थापनासागै संविधानको धारा ७६(५) अनुसार परमादेशका आधारमा २९ असारमा प्रधानमन्त्री नियुक्त भएका थिए । संविधान अनुसार उनले प्रधानमन्त्री नियुक्त भएको एक महिनाभित्र विश्वासको मत लिनुपर्ने प्रावधान छ ।

तर देउवाले आफु सहित ५ सदस्य मात्र मन्त्रिमण्डल विस्तार गरेर पहिले विश्वासको मत परिक्षणका लागि संसदमा जान लागेका हुन् ।

माओवादीले देउवालाई विश्वासको मत दिने निर्णय गरेको छ । माओवादीको संसदमा ४८ सांसद छन् । सभामुख वाहेकका ति सांसदहरुले अव देउवाको पक्षमा मतदान गर्नेछन् । माओवादीले जे निर्णय गर्छ, त्यसैको पक्षमा उभिने संसदलमा एक जना सांसद छक्कवहादुर लामा पनि छन् । यो सहित ४९ मत देउवाको पक्षमा पर्नेछ ।