काठमाडौँ । पौडी खेल्ने क्रममा प्यूठानको माडी नदीमा बगेर दुई बालिका बेपत्ता भएकी छन् । बेपत्ता हुनेमा सरुमारानी गाउँपालिका ४ बैकेका बोमबहादुर थापा मगरकी आठ वर्षीया छोरी विपना र मान्द्रेका नुमबहादुर थापा (मर्साङी मगर)की सात वर्षीया छोरी सर्मिला रहेकी जिल्ला प्रहरी कार्यालय प्यूठानका सूचना अधिकारी प्रहरी निरीक्षक देवीप्रसाद गैरेले जानकारी दिए ।

सोमबार अपरान्ह ३ बजे पौडी खेल्ने क्रममा उनीहरू नदीमा बगेको प्रहरीले जनाएको छ । स्थानीयबासीका अनुसार दुवै जना बाख्रा चराउन गएका थिए । सोही क्रममा पौडी खेल्ने क्रममा बगेर बेपत्ता भएको स्थानीयवासीले जनाएका छन् ।

स्थानीय बासिन्दा र प्रहरीको टोलीले बेपत्ता बालिकाहरूको खोजी कार्य जारी राखेको सूचना अधिकारी गैरेले जानकारी दिए ।