काठमाण्डौ । सिटिजन्स बैंक इन्टरनेशनल लिमीटेडले गत आर्थिक वर्षको लाभाम्सद्धारा शेयरधनीलाई १४ प्रतिशतभन्दा बढी लाभांश वितरण गर्नसक्ने देखिएको छ ।

गत आर्थिक वर्ष २०७७÷७८ का लागि बैंकको कुल वितरणयोग्य मुनाफा १ अर्ब ८० करोड ६१ लाख रुपैयाँ रहेको छ । बैंकको चुक्तापूँजी १२ अर्ब ५७ करोड रुपैयाँ रहेको सिटिजन्स बैंकले जनाएको छ । जसअनुसार बैंकले आफ्नो शेयरधनीलाई १४ दशमलब ३६ प्रतिशतसम्म लाभांश बाँड्नसक्ने देखिएको हो ।

बैंकको खूद नाफा ३३ दशमलब ४ प्रतिशतले बढेर १ अर्ब ५९ करोड पुगेको छ । अघिल्लो वर्षको सोही अवधिमा खूद नाफा १ अर्ब १९ करोडमा सीमित थियो ।

यस्तै, अघिल्लो वर्षको चौथो त्रैमाससम्म २ अर्ब ८८ करोडमा सीमित खूद ब्याज आम्दानी बढाएर यो वर्ष ३ अर्ब ६० करोडको उचाई चुमाएको छ । यसरी खूद ब्याज आम्दानीतर्फ बैंकले २५ दशमलब ८ प्रतिशतको फड्को मारेको छ ।

बैंकले चौथो त्रैमासिकमा निक्षेप संकलन ५८ दशमलब ९२ र कर्जा लगानी ५० दशमलब १३ प्रतिशतले बढाएको छ । बैंकले समीक्षा अवधिमा १ खर्ब ४३ अर्ब बढी निक्षेप संकलन गरी १ खर्ब २३ अर्ब बढी कर्जा परिचालन गरेको छ ।

कोरोना संक्रमण नियन्त्रणका लागि पटक–पटक लगाइएको लकडाउनको प्रभाव बैंकको कर्जातर्फ देखिएको छ । जसको फलस्वरुप अघिल्लो वर्ष १ दशमलब ५५ प्रतिशत मात्र रहेको खराब कर्जाको अनुपात केही बढी २ दशमलब ७७ प्रतिशत पुगेको छ ।