काठमाडौं । गत आर्थिक वर्ष २०७७/७८ को असार मसान्तसम्ममा करिब ४५ लाख करदाता रहेका छन् । गत वर्ष करदाताको संख्या ४४ लाख ४६ हजार ९ सय २६ पुगेको आन्तरिक राजस्व विभागले जनाएको छ ।

२०७८ असार मसान्तसम्ममा व्यक्तिगत तथा संस्थागत गरी सो संख्या रहेको हो । विभागका अनुसार अघिल्लो आर्थिक वर्ष २०७६/७७ मा करदाता संख्या ३६ लाख २४ हजार ९ सय २१ रहेको थियो ।

गत आर्थिक वर्ष व्यक्तिगत स्थायी लेखा नम्बर दर्ता भएका करदाता २४ लाख ७४ हजार ७ सय ६८ पुगेका छन्, जुन अघिल्लो आवको भन्दा ५ लाख १८ हजारभन्दा धेरै हो । अघिल्लो आर्थिक वर्षमा १९ लाख ५६ हजार १ सय ९३ जनाले व्यक्तिगत प्यान लिएको विभागको तथ्यांक छ ।

यसैगरी सोही अवधिमा आयकर बुझाउने करदाता १५ लाख ७९ हजार ६ सय ४९, मूल्य अभिवृद्धि करतर्फ २ लाख ६९ हजार २ सय ९३, अन्तःशुल्कतर्फ १ लाख ४ हजार ५० र स्रोतमा कर कट्टीतर्फको करदाता ९ हजार ९ सय ९८ पुगेका छन् ।