काठमाडौं । नेपालमा हालसम्म विभिन्न मुलुकबाट करिब ८७ लाख ८२ हजार मात्रा कोरोनाविरुद्धको खोप भित्रिएको छ । जसमध्ये ६० लाख खोप सरकारले खरिद गरेको छ । खरिद गरिएकामध्ये १० लाख खोप अझै आउँन बाँकी छ । भने ३७ लाख ८२ हजार खोप अनुदानमा प्राप्त भएका छन् ।

स्वास्थ्य तथा जनसंख्या मन्त्रालयका अनुसार हालसम्म प्राप्त खोपमध्ये सबैभन्दा बढी चीनबाट आएको छ । जसमा ४० लाख खोप सरकारले खरिद गरेको छ । भने चीन सरकारले १८ लाख खोप अनुदानमा दिएको छ ।

भारतसँग सरकारले २० लाख कोभिसिल्ड खोप खरिदको सम्झौता गरेको थियो । खरिद सम्झौताअनुसार १० लाख खोप मात्र नेपाल आएको छ भने १० लाख अझै आउन सकेको छैन् । भारतले थप १ लाख कोभिशिल्ड खोप नेपाली सेनालाई निःशुल्क दिएको थियो । त्यस्तै ३ लाख ४८ हजार खोप कोभ्यासमार्फत प्राप्त भएको छ ।

अमेरिकाबाट जे एण्ड जे कम्पनीको १५ लाख ३४ हजार खोप अनुदानमा आएको मन्त्रालयका प्रवक्ता डा कृष्ण पौडेलले बताए । उक्त खोप काठमाडौं उपत्यकासहित सातै प्रदेशमा लगाउने क्रम जारी छ ।

हालसम्म कोरोनाविरुद्धको खोपको पहिलो मात्रा ४१ लाख ६३ हजार २५१ ले लगाएका छन् । २० लाख २११ जनाले पूर्ण मात्रा खोप लिएका छन् ।

असोज मसान्तसम्म एक तिहाइलाई खोप
सरकारले असोज मसान्तसम्म एकतिहाई जनसंख्यालाई कोरोनाविरुद्धको खोप दिइसक्ने जनाएको छ । स्वास्थ्य तथा जनसंख्या मन्त्रालयका अनुसार अबको दुई महिनामा १ करोड २ लाख खोप नेपाल आइपुग्ने छ ।

स्वास्थ्य सचिव डा रोसन पोखरेलका अनुसार अबको दुई सातामा जापान सरकारले अनुदानमा दिने अष्ट्राजेनिकाको खोप १६ लाख र चिनियाँ साइनोफार्म कम्पनीका भेरोसेल खोप १६ लाख गरी ३२ लाख मात्रा अनुदानमा आउँदैछ ।

सरकारले भेरोसेल ६० लाख र कोभिशिल्ड १० लाख गरी ७० लाख मात्रा खोप खरिद प्रक्रिया अगाडि बढाएको छ ।

स्वास्थ्य राज्यमन्त्री उमेश श्रेष्ठले असोज मसान्तसम्ममा एकतिहाई जनसंख्यालाई खोप दिइसक्ने दाबी गरे । उनले हाल दैनिक तीन लाखको हाराहारीमा खोप दिइँदै आएको पनि बताए । उनले भने, “हिजो मात्र २ लाख ६० हजारलाई कोरोनाबिरुद्धको खोप दिइएको छ ।”

इपिडिमियोलोजी तथा रोग नियन्त्रण महाशाखाका पूर्वप्रमुख डा बाबुराम मरासिनी असोज महिनासम्म एकतिहाई जनसंख्यालाई पूर्णमात्रा खोप दिनु चुनौतीपूर्ण रहेको बताउँछन् । उनी भन्छन्,“खोप कार्यक्रम नै कछुवा गतिमा चलिरहेको रहेको छ ।”

डा मरासिनी कोरोनाको तेस्रो लहर आउनु अघि घना बसोबास भएका क्षेत्रका नागरिकलाई छिटो खोप दिनुपर्ने मत राख्छन् ।

माघसम्ममा ५ करोड बढी खोप पाउने अपेक्षा
सरकारले खरिद, अनुदान र कोभ्याक्समार्फत आउँदो माघसम्म ५ करोड २२ लाख ८२ हजार खोप प्राप्त गर्ने जनाएको छ । (पुस र माघ ) दुई महिनामा मात्र करिब ३ करोड २३ लाख मात्रा खोप आउने गरी सम्झौता भएको मन्त्रालयले जनाएको छ ।

अमेरिकाबाट १२ देखि १८ वर्ष उमेर समूहका लागि फाइजर कम्पनीको ६० लाख मात्रा खोप खरिद प्रक्रिया शुरू भइसकेको मन्त्रालयले जनाएको छ । पुस र माघ महिनामै कोभ्याक्सबाट २ करोड ६३ लाख मोडर्ना कम्पनीको खोप भित्रिने मन्त्रालयले जनाएको छ । जसमा १ करोड १३ लाख अनुदान, १ करोड १० लाख कोभ्याक्स सुविधाअन्तर्गत र बाँकी ४० लाख खरिद गरिने छ ।

स्वास्थ्य तथा जनसंख्या राज्यमन्त्री श्रेष्ठका अनुसार खोप खरिदका लागि नेपाल सरकार र एसियाली विकास बैंकका बीचमा १६५ मिलियन अमेरिकी डलरको ऋणसम्झौता हुने तयारी छ ।

कोरोनाको तेस्रो लहरमा बालबालिका बढी प्रभावित हुने विज्ञहरुले बताउँदै आएका छन् । शुक्रराज ट्रपिकल तथा सरुवा रोग अस्पतालका डा शेरबहादुर पुन कोरोनाको तेस्रो लहरबाट बालबालिका बढी नै प्रभावित हुने जोखिम रहेको बताउँछन् ।

‘पहिलो लहरभन्दा दोस्रो लहरमा बालबालिकाहरुमा संक्रमणदर बढेको थियो तेस्रो लहरमा पनि यो दर बढ्ने संकेत देखिएको छ’, उनी भन्छन् । केही देशमा बालबालिकालाई पनि कोरोनाविरुद्धको खोप लगाउन थालिएको छ ।