काठमाडौं । संयुक्त राष्ट्रसंघको शान्ति मिशनमा जानका लागि नेपाल प्रहरीले लिने आन्तरिक परीक्षा (प्रि–स्याट)को प्रश्नपत्र परीक्षा अगावै बाहिरिएको आशंकामा २ जना प्रहरी नियन्त्रणमा परेका छन् । प्रश्नपत्र लिक गरेको आशंकामा प्रधान कार्यालयबाट साइबर ब्यूरोमा सरुवा भएका कुमार शाह र युएन शाखामा कार्यरत कार्यालय सहयोगी सुरेश बमलाई नियन्त्रणमा लिइएको हो ।

संयुक्त राष्ट्रसंघको शान्ति मिशनमा जान नेपाल प्रहरीले लिने आन्तरिक परीक्षा (प्रि–स्याट)को प्रश्नपत्र परीक्षा अगावै बाहिरिएको आशंकामा प्रहरी प्रधान कार्यालयले डिआइजी वसन्त लामाको नेतृत्वमा ६ सदस्यीय छानविन समिति बनाएको थियो ।

युएन शाखाकै तल्लो दर्जामा कार्यरत दुई जना कर्मचारीले प्रि स्याट परीक्षाको प्रश्न पत्र दराजबाट चोरी भएको हुन सक्ने भन्दै प्रहरी प्रधान कार्यालयले डिआइजी लामाको नेतृत्वमा छानविन समिति गठन गरेको थियो । उक्त छानविन समितिले दिएको प्रतिवेदनका आधारमा कारबाही प्रक्रिया अघि बढ्ने प्रहरी प्रधान कार्यालयका प्रवक्ता वसन्त कुँवरले जानकारी दिए ।

शनिबार भएको प्रि स्याट परीक्षाको प्रश्न पत्र बाहिरएको आशंकामा गरिएको थियो । त्यही आधारमा परीक्षा एक घण्टा ढिलो गरी सुरु भएको थियो । प्रहरी प्रधान कार्यालयमा शुक्रबार र शनिबार प्रि स्याट परीक्षा भएको थियो । यसमा उत्तीर्ण हुनेलाई मात्र मिसनको अन्तिम परीक्षामा सहभागी गराउने गरिएको छ ।

यसअघि सन् २०१८ मा भएको प्रि स्याट परीक्षाको प्रश्न पत्र परीक्षा अगावै बाहिरिएको पाइएपछि अर्को जाँच लिइएको थियो ।