काठमाडौँ । नेपाल वायु सेवा निगममा कार्यरत विभिन्न कर्मचारी संगठनहरूले प्रधानमन्त्री शेर बहादुर देउवालाई भेटेर ज्ञापन पत्र बुझाएका छन् । उनीहरूले सरकारी स्वामित्वमा रहेको निगमलाई निजीकरण बनाउन खोजिएको भन्दै रोक्न पहल गर्न प्रधानमन्त्रीलाई भेटेका हुन् ।

यस्तै, कर्मचारी संगठनहरूले निगमका महाप्रबन्धक निर्देशक डिम प्रसाद पौडेलको बर्खास्ती गर्नसमेत माग गरेका छन् । उनीहरूले महाप्रबन्धकको नेतृत्वमा सरकारी स्वामित्वमा रहेको वायु सेवा निगमलाई निजीकरण गर्न खोजिएको भन्दै बर्खास्तीको माग गरेका हुन् ।

विभिन्न ९ वटा कर्मचारी संगठनहरूले निगमलाई निजीकरण गर्ने निर्णय खारेज गर्नु पर्ने, महाप्रबन्धकलाई तत्काल बर्खास्त गर्नु पर्ने, महाप्रबन्धकको ३०० प्रतिशत अस्वभाविक तलब वृद्धि खारेज गर्नु पर्ने र सञ्चालक समितिमा व्यवसायिक स्वार्थ बाझिने संघसंस्थामा आबद्ध व्यक्तिहरूलाई खारेज गर्नु पर्ने माग राखेका छन् ।

‘३३ औँ दिन कर्मचारी आन्दोलनमा तालुकदार मन्त्रालय बेखबर र उदासीन हुनु निगमलाई सरकारी निकायबाट उपेक्षित गरिएको महसुस आम कर्मचारीहरूले गरेका छन्,’ विज्ञप्तिमा भनिएको छ ।