काठमाडौं । नेकपा एमालेको वरिष्ठ नेता माधव कुमार नेपाल पक्षले पार्टी एकताका लागि अध्यक्ष केपी शर्मा ओलीलाई अल्टिमेटम दिने तयारी गरेको छ ।

ओलीलाई पार्टी एकताका लागि निश्चित समयावधि दिएर एकतामा आउन आह्वान गर्ने र त्यसो गर्दा पनि ओली सच्चिएर आउन तयार नभए अलग पार्टी बनाउने वा के गर्ने भन्नेमा निर्णय लिएर जानुपर्नेमा नेताहरुले जोड गरेको केन्द्रीय सदस्य मेटमणि चौधरीले जानकारी दिए ।

बिहीबारबाट सुरु भएको नेता नेपाल पक्षको केन्द्रीय कमिटी बैठकमा आज ५५ जना केन्द्रीय सदस्यहरुले आफ्नो धारणा राखेका थिए । केन्द्रीय सदस्यहरुलाई बोल्नका लागि तीन मिनेट छुट्टाइएको थियो ।

केन्द्रीय कमिटीको बैठक केहीबेरका लागि स्थगित गरेर नेपाल पक्षको स्थायी कमिटी सदस्यहरु छलफलमा जुटेका छन् ।