काठमाडौँ । गृहमन्त्री बालकृष्ण खाँणले तल्लो तहका प्रहरी जवानले तालिम गर्दा दिइने खानाबारे जिज्ञासा राखेका छन् । उनले शुक्रबार आफै तालिम दिइरहेका र लिइरहेका तल्लो तहका प्रहरी अधिकृत र जवानलाई फोन गरेर जानकारी लिएका हुन् ।

सुदूरपश्चिम प्रदेश प्रहरी तालिमकेन्द्र दिपायलमा तालिम दिइरहेका चार जना र लिइरहेका एक जनालाई फोन गरेर जानकारी लिएका हुन् । गृहमन्त्री खाँणले शुक्रबार दिपायल प्रशिक्षण स्थल बुडरमा तालिम दिइरहेका चार जनालाई टेलिफोन गरेर त्यहाँ उनीहरूलाई गरिएको व्यवस्था सरकारले प्रहरीलाई उपलब्ध गराएको रासनमा उल्लेख भए अनुरुप छ कि छैन भनेर सोधेका हुन् । खाँणले तालिम दिइरहेका प्रहरी निरीक्षक रणबहादुर चन्द, प्रहरी मेजर सुव्दार महेन्द्रराज गिरी, प्रहरी हवल्दार पदमबहादुर भण्डारी र प्रहरी जवान लोकेश विष्टलाई तथा तालिम लिइरहेका प्रहरी सहायक निरीक्षक सञ्जय धामीलाई टेलिफोन गरेका स्वकीय सचिव बिजेश न्यौपानेले जानकारी दिए ।

प्रहरी सहायक निरीक्षक धामीले गृहमन्त्रीले टेलिफोन गरेर तालिम केन्द्रमा भएको खानाको व्यवस्था अन्य प्रबन्ध, विषयबस्तु अनुरुपको तालिम भइरहेको छ कि छैन भनेर सोधेको जानकारी दिए । ‘गृहमन्त्रीज्यूले टोलिफोन गरेर तालिम केन्द्रमा भएको खानाको व्यवस्था, तालिममा उल्लेख भएका विषयबस्तु र सरकारको स्केल अनुरुपको खानाबारे जानकारी लिनुभयो,’ सहायक निरीक्षक धामीले भने ।

गृहमन्त्री खाँणले सरकारले दिएको सुविधा जीवन धान्न प्रयाप्त छ कि छैन ? खाना पौष्टिक छ कि छैन ? सरकारले दिएको स्केल अनुरुपको खाना छ कि छैन ? साथीहरू तालिममा बसेका बेलामा विरामी भएका छन् कि छैनन् ? केही असुविधा छ कि छैन ? भनेर जिज्ञासा राखेका थिए । स्वकीय सचिव बिजेश न्यौपानेका अनुसार तल्लो तहका प्रहरी अधिकृत र जवानको मनोबल बढाउन र सरकारले उपलब्ध गराएको सेवा सुविधा लक्षितसम्म पुगेको छ कि छैन भनेर आफैले जानकारी लिएका हुन् । उनीहरूको कुरा सुनेपछि केही थप्न पर्ने भए योजना बनाउने नपर्ने भएमा व्यवस्थित गराउने प्लान खाँणको छ ।

प्रहरीमा तल्लो तहका अधिकृत र जवानलाई आवश्यक पर्ने पौष्टिक तत्व नभएको खाना खुवाउने गरेको गुनासा आइरहन्थे । त्यसमा सत्यतथ्य के हो भनेर पनि मन्त्रीले आफै बुझेको सचिवालयले जनाएको छ ।

मन्त्री खाँणले तालिम राम्रोसँग गर्न र नागरिक सुरक्षा र राष्ट्र सुरक्षालाई प्राथमिकतामा राखेर काम गर्न निर्देशन दिएका थिए । ‘नागरिक सुरक्षा र राष्ट्र सुरक्षालाई प्राथमिकतामा राखेर काम गर्नुहोला । अन्य कुनै असुविधा भएमा भन्नुहोला भन्नुभयो,’ प्रहरी निरीक्षक चन्दले भने ।

अहिले सुदूरपश्चिम प्रदेश प्रहरी तालिमकेन्द्र दिपायलमा ३९५ जना प्रहरी जवानले तालिम गरिरहेका छन् । त्यस्तै ३० जना प्रहरी जवान (अनुसन्धान) जुनियर प्रहरी अधिकृत (अपराध अनुसन्धानतथा नियन्त्रण)मा ३० जनाले तालिम गरिरहेका छन् ।