बुटवल । मुख्यमन्त्री शंकर पोखरेलविरुद्व दर्ता भएको अविश्वास प्रस्तावमाथि छलफल गर्न लुम्बिनी प्रदेश सभाको विशेष अधिवेशन आज सुरु हुँदैछ । अविश्वास प्रस्तावमाथि छलफल गर्न प्रदेश सभाको विशेष अधिवेशन दिउँसो १ बजे सुरु हुँदै छ ।

मुख्यमन्त्री पोखरेलविरुद्ध विपक्षी नेपाली कांग्रेस, नेकपा (माओवादी केन्द्र), जनता समाजवादी पार्टी जसपा र राष्ट्रिय जनमोर्चाका सांसदले यही साउन १९ गते तेस्रो पटक अविशवास प्रस्ताव दर्ता गराएका थिए । उनीहरुले प्रदेश सभा सचिवालयमा दर्ता गराएको अविश्वास प्रस्तावमा ३४ जना सांसदको हस्ताक्षर छ ।

यसअघि मुख्यमन्त्री पोखरेल विरुद्ध विपक्षी गठबन्धनले गत वैशाख ६ र २६ गते पनि अविश्वासको प्रस्ताव दर्ता गरेका थिए । ६ गते दर्ता गरेको अविश्वासको प्रस्तावमाथि छलफल हुने दिन वैशाख १९ गते मुख्यमन्त्रीबाट पोखरेलले राजीनामा दिएर एमालेको एकल बहुमत दाबी गर्दै सोही दिन पुनः मुख्यमन्त्रीमा नियुक्त भएका थिए ।

विपक्षी गठवन्धन दलका सांसदले नेकपा माओवादी केन्द्रका संसदीय दलका नेता कुलप्रसाद केसीलाई मुख्यमन्त्रीका रुपमा ४२ सांसदको हस्ताक्षर सहित दाबी पेश गरेपनि प्रदेश प्रमुखले पोखरेललाई नै नियु्क्त गरेका थिए । वैशाख २६ गते दोस्रो पटक अविश्वासको प्रस्ताव दर्ता भएपनि तत्कालीन प्रदेश प्रमुख धर्मनाथ यादवले विशेष अधिवेशन आह्वान गरेका थिएनन् ।

लुम्बिनीमा हाल कायम प्रदेशसभा सदस्यहरुको संख्या ८० छ र बहुमतका लागि ४१ सांसदको समर्थन आवश्यक पर्छ ।

सत्तारुढ दल एमालेका ३८ सांसद छन् । विपक्षी दल नेपाली कांग्रेसका १९, नेकपा माओवादी केन्द्रका १८, जनता समाजवादी पार्टीका ३ र राष्ट्रिय जनमोर्चाका १ गरी ४१ सांसद छन् । मुख्यमन्त्री विरुद्धको अविश्वास प्रस्ताव पारित हुन ४१ मत नै आवश्यक पर्छ ।

विपक्षी दलका सांसद एकजुट हुँदा मुख्यमन्त्री पोखरेल विरुद्ध अविश्वासको प्रस्तावको पक्षमा बहुमत पुग्ने छ ।

यसअघि गण्डकी प्रदेशमा पनि प्रदेश सभाको बहुमत जुटाउन नसक्दा एमालेका पृथ्वी सुब्बा गुरुङ सत्ताबाट बाहिरिएका थिए । अहिले गठवन्धनको तर्फबाट कांग्रेसका कृष्णचन्द्र नेपाली पोखरेलले प्रदेश सरकारको नेतृत्व सम्हालिरहेका छन् ।