काठमाडौं । नेपाल राष्ट्र बैंकले सार्वजनिक गरेको चालु आर्थिक वर्ष २०७८/८९ को मौद्रिक नीतिमा उद्योगी व्यवसायीलाई फाइदा पुगेको पूर्व गर्भनरहरूले बताएका छन् ।

राष्ट्र बैंकका पूर्व गर्भनर चिरञ्जिवी नेपालले राष्ट्र बैंक केही दबाबमा आएर मौद्रिक नीति जारी गरे पनि उद्योगी व्यवसायीलाई फाइदा पुगेको बताएका छन् । मेरोन्युजसँग कुरा गर्दै उनले एक करोड रुपैयाँसम्मको उद्यम व्यवसाय कर्जामा २ प्रतिशत मात्रै प्रिमियम थप गर्न पाइने व्यवस्थाले उनीहरूलाई फाइदा पुगेको बताए ।

पूर्व गर्भनर नेपालले उद्यम व्यवसाय संचालन गर्न एक करोडसम्मको ऋण उपयोग गर्ने ऋणीको हकमा आधार दरमा अधिकतम २ प्रतिशत बिन्दुले थप पाउने व्यवस्थाको अवलोकनको आवश्यकता भएकोमा जोड दिए ।

यस्तै पूर्व गर्भनर दीपेन्द्र बहादुर क्षेत्रीले मुलुकको आर्थिक अवस्थामा कार्य सरकारले गर्ने कि राष्ट्र बैंकले भन्ने प्रश्न चालु आर्थिक वर्ष २०७८/८९ को मौद्रिक नीतिमा देखिएको गुनासो गरे ।

उनले मेरोन्युज डटकमसँग कुरा गर्दै गत वर्षमा भएका बुँदालाई निरन्तरता दिँदै मुद्राभन्दा अर्थतन्त्रमा केन्द्रीय भएकाले मौद्रिक नीतिले प्रश्न सिर्जना गरको उल्लेख गरे ।