काठमाडौँ । नेकपा एमालेले पार्टी केन्द्रीय सदस्यहरूको संख्या थप गरेर निर्वाचन आयोगमा नयाँ विवरण अध्यावधिकका लागि पठाएको छ । २ सय ३ सदस्यीय केन्द्रीय कमिटीको नाम निर्वाचन आयोगमा यस अगाडि दर्तामा थियो ।

अहिले एमालेले त्यो संख्या थप गरेर २ सय ६० को नयाँ विवरण पठाएको हो । निर्वाचन आयोगका सचिव सुरेश अधिकारीले एमालेबाट नयाँ विवरण अध्यावधिक गरिदिन भन्दै पत्र आएको पुष्टि गरे ।

‘एमालेले आफ्नो केन्द्रीय कमिटीको संख्या बढाएर नयाँ विवरण अध्यावधिक गरिदिन आग्रहसहितको पत्र निर्वाचन आयोगमा पठाएको छ,’ सचिव अधिकारीले भने ।

यसअघि एमाले वरिष्ठ नेता माधव कुमार नेपालले आफू निकट नेताहरूसँग आफू पक्षका नेताहरूलाई अध्यक्ष केपी शर्मा ओलीले कारबाही गरेर नयाँ नामसहितको विवरण आयोगमा पठाएको बताएका थिए ।

एमाले विभाजनको मुखमा रहेकै बेला निर्वाच्न आयोगमा नयाँ विवरण अध्यावधिकको लागि पुगेको हो ।