काठमाडौँ । जनता समाजवादी पार्टी (जसपा)का संघीय परिषद् अध्यक्ष डा. बाबुराम भट्टराईले नेकपा एमाले छाडेर माधव कुमार नेपालले गठन गरेको नेकपा एमाले (समाजवाद)सँगै देश याँ मोडेलमा गएको बताएका छन् । उनले नेकपा एमाले (समाजवादी) पार्टी गठन भएसँगै देश समाजवादमा गएको संकेत गरेको बताएका हुन् ।

बिहीबार काठमाडौँस्थित राष्ट्रियसभा गृहमा आयोजित एक कार्यक्रममा उनले भने, ‘एमालेभित्र विद्रोह गरेर माधव नेपाल जीले एमाले (समाजवादी) भनेर फेरि अर्को पार्टी सुरुवात गर्नु भएको छ, यसले फेरि नयाँ समाजवादको मोडेल खोज्नेतिर देश गइराखेको छ, त्यो आजको आवश्यकता हो ।’

कार्यक्रममा बोल्दै उनले युवा पुस्तालाई आफूहरूले नयाँ बाटो देखाइदिनु पर्ने बताए । यदि, नयाँ बाटो देखाइदिन सके नेपालले विश्वलाई नयाँ गति दिन सक्ने उनको भनार्इ थियो ।

‘हामी ७० आसपास भएकाले धेरै गर्न नसकौँला, तर युवा पुस्तालाई नयाँ बाटो देखाइदिने आँट गर्ने हो भने नेपालले विश्वलाई नयाँ विचार र ज्ञान दिन सक्छ,’ उनले भने ।