काठमाडौं । पुर्वगहमन्त्री राम बहादुर थापा ‘बादल’का साईला भाई नरेश थापा रिहा भएका छन् । उच्च अदालत पाटनले नरेशकुमार थापालाई २०७६ माघ २७ मा १ वर्ष ६ महिना थुनामा राख्न आदेश गरेको थियो । आदेशपछि जेल जीवन भुक्तान गर्न डिल्लीबजार चलान भएका थापा सोमबार रिहा भएका हुन् । उनी तोकिएको सजाय काटेर छुटेका हुन् ।

निर्माण व्यवसायी महासंघका अध्यक्ष शरदकुमार गौचनको हत्या अभियोगमा जेल परेका गुण्डा नाइके समिरमानसिंह बस्नेसँग मिलेर आपराधिक गिरोह सञ्चालन गरेको अभियोगमा थापालाई प्रहरीको केन्द्रीय अनुसन्धान ब्युरो (सीआईबी) ले पक्राउ गरेका थियो ।

आपराधिक लाभ र संगठित अपराध मुद्दामा जिल्ला अदालत काठमाडौंले उनलाई धरौटीमा रिहा गर्ने आदेश गरे पनि उच्च अदालतले जेल सजाय तोकेको थियो ।महानगरीय अपराध महाशाखाको टोलीले नरेशको कनेक्सन गुण्डा नाइके समीरमानसिंह बस्नेत समूहसँग देखिएको खुलाएको थियो । २३ असोज २०७४ मा समीरमान समूहले गौचनको हत्या गरेका थिए ।

प्रहरीको अनुसन्धानले उनी समीरसिंहलाई भेट्न पटक पटक सुन्धारास्थित कारागार पुगेको जनाएको थियो ।