काठमाडौँ । नेकपा एमालेबाट विभाजित भई नयाँ पार्टी नेकपा (एकीकृत समाजवादी) दर्ता गर्ने तयारीमा रहेको माधव नेपाल पक्षको केन्द्रीय समिति बैठक आज पनि चन्द्रागिरी रिसोर्टमा जारी रहेको छ ।

दल दर्ता गर्न निवेदन दिएको उक्त पक्षले बुधबार निर्वाचन आयोगमा सनाखत गर्न २० प्रतिशत केन्द्रीय सदस्य पुर्‍याउनु पर्ने भएको छ । एमालेको तत्कालीन २०३ सदस्यीय केन्द्रीय कमिटीमध्ये कम्तिमा ६० जना सदस्य आफ्नो पक्षमा रहेको बैठकमा उपस्थित एक नेताले बताए ।

यस्तै, नेपाल पक्षले २६ जना सांसद पुगेको दाबी गरिएको छ । बैठकले अन्तरिम विधान, घोषणा पत्र र नियमावली पारित गर्ने छ ।

यसैबीच, केपी शर्मा ओली प्रधानमन्त्री हुँदा मन्त्री बनेको प्रेम आलेसहित सुदूरपश्चिमबाट भीम रावलनिकट दीर्घ सोडारी र तारा लामा तामाङ बैठकमा उपस्थित रहेका छन् ।