काठमाडौं । रौतहटका एसपी सिद्धिविक्रम शाहलाई प्रदेश प्रहरी कार्यालयमा तान्ने तयारी भएको छ । प्रहरी प्रधानकार्यालयले एसएसपी कृष्ण महतको नेतृत्वमा छानबिन थालेपछि उनलाई प्रदेश प्रहरी कार्यालयमा तानेर त्यहाँ अर्को एसपी पठाउन लागिएको हो ।

निमयविपरित घुमुवा राखेको र पत्रकारलाई फसाउन लागुऔषध प्रयोग गरिएको सम्बन्धमा रौतहटका एसपी सिद्धिविक्रम शाहमाथि छानबिन शुरु भएको प्रहरी प्रधानकार्यालय स्रोतले भन्यो । शाहका घुमुवाले पत्रकारलाई लागुऔषध राखेर फसाउन खोजेको विषयमा एसपीकै संलग्नता रहेको आरोप लागेपछि प्रहरी प्रधान कार्यालयले एसएसपी महतको संयोजकत्वमा समिति गठन गरी उनीमाथि छानवीन शुरु गरेको स्रोतको दावी छ ।

‘विवाद आयो त्यसकारण उनलाई प्रदेश प्रहरी कार्यालयल पठाउन लागिएको हो’, प्रहरी प्रवक्ता एवं एसएसपी वसन्तबहादुर कुँवरले भने । पत्रकार मोजि बुल्लाह र शेख अतिउल्लाहलाई फसाउन लागुऔषध राखिएको घटना रौतहटका प्रहरी प्रमुख एसपी सिद्धिविक्रम शाहकै योजनामा भएको आशंका गरिएको थियो । एसपी शाहले यो घटना लगतै घटनाका अभियुक्तसँग गरेको कुराकानीको अडिओ सार्वजनिक भएपछि उनलाई शंकाको घेरामा राखिएको थियो ।

नेपाल पत्रकार महासंघ रौतहट शाखाले एसपी शाहलाई तत्काल निलम्बन गरेर कारबाही गर्न माग गरेको छ । गत साउन ३२ गते मोजिबुल्लाहको बीआर ३० एस १८८७ नम्बरको मोटरसाइकलबाट प्रहरीले गौरमा चेकजाँचका क्रममा लागुऔषध नाइट्राभेट १०५ ट्याब्लेट बरामद गरेको दाबी गरेको थियो। तर घटनामा उनीहरुको संलग्नता नदेखिएको र प्रहरीकै संलग्नता रहेको भन्दै पत्रकारलाई सोमबार छाडिएको थियो । नियमविपरित राखिएका घुमुवा प्रहरीले पत्रकार फसाउन खोज्दा आफै फसेका थिए ।

घुमुवा प्रहरीले पत्रकारकै मोटरसाइकलमा लागुऔषध राखेर फसाउन खोज्दा आफै फसेका हुन् । पत्रकारको मोटरसाइकलमा लागुऔषध राखेर फसाइएका दुई प्रहरी अहिले निलम्बनमा परेका छन् । रौतहटका सञ्चारकर्मीले प्रहरीका घुमुवाले अनियमितता गरेको समाचार लेखेपछि उनीलाई लागुऔषध प्रयोग गरी सुनियोजित तवरले फसाउन खोजेका थिए । जिल्ला प्रहरी कार्यलय रौतहटमा कार्यरत असइ उदय यादव र प्रहरी जवान मनोज साहलाई निलम्बन गरी थप कारवाहीको प्रकृया अघि बढाएको थियो ।

असइ उदय र प्रहरी जवान मनोजको निर्देशनमा धीरज र जितेशकुमारले ३२ साउनमा स्थानीय होटेलअगाडि पार्क गरी राखेको मोजिबुल्लाहको मोटरसाइकलमा लागुऔषध राखेका थिए । मोजिबुल्लाह भने होटेलभित्र खाजा खान छिरेका बेला उनीहरु लागुऔषध राखेपछि घुमुवा प्रहरी पुगेर उनलाई पक्राउ गरिएको थियो । लागुऔषध राखेलगत्तै उनीहरूले नै प्रहरीलाई खबर गरेका थिए । घटनाको पाँच दिनपछि होटेलको सिसिटिभी फुटेज सार्वजनिक भएपछि मात्र प्रहरीकै मिलेमतोमा मोजिबुल्लाहलाई फसाइएको रहस्य खुलेको थियो ।