काठमाडौं । उपचार गराउन आउने बिरामी र उनका आफन्तलाई विभिन्न अफवाह र डर देखाएर निजी अस्पतालका लागि बिचौलियाको कामगर्ने १० जनालाई पक्राउ परेका छन् ।

जिल्ला प्रहरी कार्यालय मोरङले विराटनगर महानगरपालिका अन्तर्गतका विभिन्न अस्पतालहरूमा उपचार गराउन आएका बिरामी तथा बिरामीका आफन्तहरूलाई भेटी ‘यहाँ डक्टर राम्रो छैन, यो अस्पतालमा कोरोना धेरै छ, उपचार राम्रो छैन, औषधी राम्रो छैन’ भन्ने जस्ता अफवाह फैलाएर आफूले कमिसन पाउने अस्पतालका लागि कामगर्ने १० जनालाई पक्राउ गरेको हो ।

प्रहरीले सुनसरी दुहवी ६ बस्ने वर्ष ५४ को श्रीराम चौधरी, सिरहा–२ बस्ने वर्ष २० को सुर्य नारायण यादव, मोरङ कटहरी गाउँपालिका–३ बस्ने वर्ष ४२ को मो जलिद, विराटनगर महानगरपालिका–७ बस्ने वर्ष १८ को विश्वास मण्डल, वर्ष २३ को रोशन गुप्ता, वर्ष १९ को सुजित यादव, वर्ष २२ को फिरोज रोय, वर्ष २१ को समिर खान, वर्ष १८ को सरोज खान र वर्ष १८ को अमित यादवलाई पक्राउ गरेको हो ।

उनीहरुले बिरामी तथा आफन्तहरूलाई झुक्यानमा पारी आफ्नो सम्पर्कमा भएको अस्पताल वा क्लिनिकमा उपचारको लागि प्रेरित गर्ने र सम्पर्कमा भएको फार्मेसीमा औषधी किन्न वाध्य गराउने बिचौलियाको कार्य गरी सर्वसाधारण नागरिकलाई दुःख हैरानी दिएको गुनासोपछि कारबाहीको थालनी गरेको प्रहरीले जनाएको छ ।

साथै मोरङ प्रहरीले यस प्रकारको व्यवहारबाट अन्य कोही पनि पीडित भएको छ वा हुन गई रहेको थाहा भएमा जिल्ला प्रहरी कार्यालय मोरङमा सम्पर्क गर्न अनुरोध गरेको छ ।