काठमाडौं । चोरीको पुष्टि भएपछि रद्ध भएको राष्ट्रसंघको शान्ति मिशनमा जान नेपाल प्रहरीले लिने आन्तरिक परीक्षा (प्रि–स्याट) भदौ १७ गते हुने भएको छ । १७ भदौमा सातवटै प्रदेश प्रहरी कार्यालय र प्रहरी प्रधान कार्यालयमा एकै समयमा सञ्चालन हुने प्रहरी प्रवक्ता प्रहरी वरिष्ट उपरिक्षक (एसएसपी) बसन्त कुँवरले जानकारी दिए ।

यसअघि साउन १५ र १६ गते लिएको परीक्षामा प्रश्नपत्र लिक भएको पुष्टि भएपछि परीक्षा रद्द गरिएको थियो । प्रश्नपत्र लिक’ भएपछि उक्त विषयमा छानबिनका लागि प्रधान कार्यालयले प्रहरी महानिरीक्षक (आईजीपी) सचिवालयमा कार्यरत डीआईजी बसन्तकुमार लामाको नेतृत्वमा ६ सदस्यीय छानबिन समिति बनाएको थियो ।

बसन्त लामा नेतृत्वको छानबिन समितिले प्रश्नपत्र चोरी भएको पुष्टि गर्दै परिक्षा रद्ध गर्न सिफारिस गरेको थियो । साथै उक्त समितिले प्रश्नपत्र लिक भएको पुष्टि गर्दै लिक प्रकरणमा जोडिएका युएन शाखामा कार्यरत तीन जना प्रहरी नायब निरीक्षक जनकबहादुर थापा, कार्यालय सहयोगी सुरेश बमला र प्रहरीको साइबर ब्युरोमा कार्यरत हवल्दार कुमार शाहलाई जागिरबाट हटाउन सिफारिस गरेको थियो । भने ११ जना प्रहरीलाई कसुर अनुसारको कारबाहीको सिफारिस समितिले गरेको थियो ।

११ जनामध्ये युएन शाखाकै प्रमुख प्रहरी उपरीक्षक (एसपी) अनुपम शमशेर जबरा, परीक्षा सञ्चालको जिम्मा पाएका अर्का एसपी बेद विष्ट र प्रहरी निरीक्षक ईश्वरी भण्डारीलाई प्रश्नपत्रको सुरक्षा गर्न नसकेको कसुर तथा अन्य आठ जना प्रहरी अधिकारीलाई विभागीय कारबाहीको सिफारिस गरिएको छ ।