काठमाडौँ । नेपाल उद्योग परिसंघले उत्पत्तिको प्रमाणपत्रलाई थप व्यवस्थित तथा सहजिकरण गर्न उत्पत्तिको प्रमाणपत्र सम्बन्धि समिति गठन गरेको छ ।

नेपालमा उत्पादन भएका वस्तुहरुको निकासीका लागि उतपत्तिको प्रमाणपत्र आवश्यक भएको परिसंघले दाबी गर्दै समिति गठन गरेको जनाएको हो ।

परिसंघका अनुसार नेपालबाट निर्यात हुने वस्तुको उत्पत्तिको प्रमाणपत्र सहज तथा सरल बनाउन निर्यातकर्तालाई उपलब्ध गराउनको लागि गठन गरेको समितिको संयोजक परिसंघका राष्ट्रिय परिषद् सदस्य अमित मोर रहेका छन् ।

नेपाल सरकारले उत्पत्तिको प्रमाणपत्र जारी गर्ने कार्याविधि परिमार्जन गर्दै परिसंघले साफ्टा तथा अन्य मुलुकहरुका लागि आवश्यक प्रमाणपत्र जारी गर्दै आएको छ ।

उद्योग विभाग अन्तर्गत रहेको उत्पत्तिको प्रमाणपत्र सम्बन्धी प्राविधिक समितिमा परिसंघ हालै सदस्यको रुपमा चयन भएको थियो । यससँगै परिसंघले भारतमा निकासी हुने वस्तुको उत्पत्तिको प्रमाणपत्र जारी गर्न आवश्यक सम्पूर्ण तयारी पुरा गरेको छ ।

सरकारले सञ्चालनमा ल्याएको नेपाल राष्ट्रिय एकद्वार प्रणाली अन्तर्गत परिसंघले तेस्रो मुलुक निकासीलाई आवश्यक उत्पत्तिको प्रमाणपत्र विद्युतीय माध्यमबाटसमेत जारी गरिरहेको परिसंघको दाबी छ ।

परिसंघले आफ्ना सदस्य संस्था तथा निर्यातकर्ताहरुलाई उत्पत्तिको प्रमाणपत्र जारी गर्ने सम्बन्धमा कुनै बाधा अड्चन वा समस्या रहेमा परिसंघमा सम्पर्क गर्नसमेत आग्रह गरेको छ ।