काठमाडौं । सुदूरपश्चिम प्रदेशमा नेकपा एमालेका १० जना प्रदेशसभा सदस्य माधव नेपाल नेतृत्वको नेकपा (एकीकृत समाजवादी)मा लागेका छन् ।

सुदूरपश्चिम प्रदेशस्थित निर्वाचन आयोगको कार्यालय धनगढीमा मंगलबार उपस्थित भएर १० सांसदले आफूहरु एमालेबाट विभाजित भइ बनेको नेकपा (एकीकृत समाजवादी) पार्टीमा रहेको स्पष्ट पारेका छन् । नेकपा एमालेको २५ जना प्रदेससभा सदस्य मध्ये मंगलबार १० जनाले समाजवादी पार्टीमा सनाखत गरेको प्रदेश सभा सदस्य दुर्गाकुमारी कामीले बताइन् । ।

हाल मन्त्री रहेकाहरु पूर्णा जोशी र लालबहादुर खड्का तथा राज्यमन्त्रीहरु चुनकुमारी चौधरी र मनाकुमारी साउँदसहित १० जना सदस्य नेपाल नेतृत्वको समाजवादीमा रहेको स्पष्ट गरेका छन् ।

यस्तै, एमाले प्रमुख सचेतक दुर्गाकुमारी कामी, पूर्व मन्त्री माया भट्ट, सांसदहरु सुशिला बुढाथोकी, कूलवीर चौधरी, अमर साउँद र बलबहादुर सोडारी पनि नेपाल नेतृत्वको पार्टीमा रहेको जनाएका छन् । आफ्ना पार्टीका अझै केही सदस्य उपस्थित हुन बाँकी रहेको कामीले बताइन् ।

निर्वाचन कार्यालयले आयोगको कार्यालयमै आएर सनाखत गर्न सांसदहरुलाई भनेको थियो । नयाँ पार्टी रोज्नका लागि निर्वाचन आयोगले भदौ २२ गतेसम्मको समयसीमा तोकेको छ ।

यसअघि प्रदेशसभामा सभामुखसहित एमालेका २५ सांसदमध्ये १८ जना माधव नेपाल समूहमा देखिएका थिए ।

बुधबार अरु तीन जना सांसदले पनि एकीकृत समाजवादीमा सनाखत गर्ने प्रदेश सभा सदस्य अमर बहादुर साउदले बताए । उनले एकीकृत समाजवादीमा सनाखत गर्नेको संख्या थपिने पनि बताए ।