काठमाडौं । सूर्य नेपाालले होटल सञ्चालन गर्नका लागि उद्योग विभागमा निवेदन दिएको छ । चुरोटमा एकलौटी व्यवसायमा लागेको बहुराष्ट्रिय कम्पनीले नेपालमा रहेको आफ्नो व्यवसायको नाफाकै पैसाले ५ तारे होटल सञ्चालनको योजना बनाएकाले विभागमा निवेदन दिएको जनाएको छ ।

होटल सञ्चालनको लागि २०७६ पुसमा विभागमा निवेदन दिएपनि अहिलेसम्म स्वीकृत नभएको सूर्य नेपालले जनाएको छ ।

सूर्य कम्पनीको भगिनी संस्थामा होटल सञ्चालन गर्न अनुमतिका लागि विभागमा निवेदन दिएको सूर्य नेपालका उपाध्यक्ष रवी के.सी.ले मेरोन्यूजडटकमलाई जानकारी दिए ।

उनले १८ अर्ब रुपैयाँ कम्पनीको पूँजी पुर्‍याएर होटल सञ्चालन गर्नका लागि निवेदन दिएको बताए । ‘विना लाइसेन्स अघि बढ्ने कुरा हुँदैन, दुई वर्षदेखि हामी सरकारसँग लाइसेन्सको पर्खाइमा छौँ,’ के.सी.ले भने ।

कम्पनीको प्रतिकित्ता १ सय दरले शेयर रकम वृद्धि गरि ६ अर्ब ५० करोड पूँजीलाई बढाएर होटल सञ्चालन गर्न निवेदन दिएको सूर्य नेपालले उल्लेख गरेको छ ।

के.सी.ले होटल सञ्चालन आवेदनलाई प्रष्ट्याउँदै भने, ‘वृद्धि भएको पुँजीले काठमाडौंमा ५ तारे होटल सञ्चालन गर्न सबै मापदण्ड पूरा हुने गरी होटल सञ्चालन गर्न निर्णय गर्दै क्यासिनो समेत सञ्चालन गरिने छ ।’

सूर्य नेपालमा सबैभन्दा बढी आईटीसी लिमिटेड इन्डियाको ५९ प्रतिशत, नेपाली लगानीकर्ताको ३९ प्रतिशत र ब्रिटिश अमेरिकन टोबाको इन्भेष्टमेन्टको २ प्रतिशत शेयर रहेको कम्पनीका उपाध्यक्ष के.सी.ले जानकारी दिए ।

यद्यपी नियमानुसार कार्य गर्दा केही बुँदाले अवरोध गरे निवेदनमा हेरफेर गर्ने भएकाले सूर्य नेपालसँग सोही बुँदामा छलफल भइरहेको विभागले जनाएको छ ।

उद्योग विभागका निर्देशक भक्त राज जोशीले सूर्य नेपाल चुरोट कम्पनीको ब्राण्ड भएकाले चुरोटलाई होटलमा मिलाउन नमिल्ने भएकाले होटल सूर्य नेपालको भगिनी संस्था हुन नसक्ने कम्पनीलाई जानकारी दिएको बताए ।

उनले भने, ‘पूँजी वृद्धि भविष्यमा गर्ने भनेर हालको नाफा लैजाने र कर्मचारीको सेवा सुविधालाई नाफा वितरण गर्ने बुँदा नमिलेकाले अगाडी बढ्न नसकेको हो ।’

सूर्य नेपालले २ वर्षदेखि होटलको लाइसेन्स कुर्दै लाभांश रोक्ने नाममा ७ अर्ब रुपैयाँ विदेशीएको आरोप विभागले लगाएको जोशीले जानकारी दिए ।

काठमाडौंमा ५ तारे होटल सञ्चालन गर्न जग्गाको समेत जोहो गरिसकेकोले सूर्य नेपालको भगिनी संस्थाको रुपमा दाबी गरेपनि नियमानुसार आवेदनमा परिवर्तन गर्नुपर्नेमा जोशीले मेरोन्यूजसँग दाबी गरे ।