काठमाडौँ । नेकपा एमालेका अध्यक्ष केपी शर्मा ओलीले सर्वोच्च अदालतमा सभामुख अग्निप्रसाद सापकोटाविरुद्ध रिट निवेदन पेश गरेका छन् । ओलीले बुधबार सभामुख सापकोटाविरुद्ध वारेसनामामार्फत रिट निवेदन पेश गरेका हुन् ।

एमालेले कारबाही सिफारिस गरेका १४ जना सांसदलाई पदमुक्त नगरेको भन्दै ओलीले सभामुखविरुद्ध रिट निवेदन पेश गरेको जनाइएको छ । ओलीले पेश गरेको निवेदन सर्वोच्चमा दर्ता हुन बाँकी रहेको छ ।

यस्तै ओलीले रिटमा कारबाही गरेका १४ सांसदलाई मान्यता दिएर दल दर्ता गरेको भन्दै निर्वाचन आयोगलाई पनि विपक्षी बनाइएको छ । एमालेले कारबाही गरेका १४ सांसदलाई पदमुक्त गर्न अन्तरिम आदेश माग गरेको छ । एमालेले माधव कुमार नपालसहित १४ सांसदलाई कारवाही गर्ने निर्णय गर्दै १ भदौमा संसद सचिवालयमा सिफारिस गरेको थियो ।

तर सभामुख सापकोटाले १३ भदौमा १४ सांसदलाई कारबाही गर्न नपर्ने बताएका थिए । सरकारले राजनीतिक दल विभाजन सम्बन्धिको अधयादेश ल्याएपछि माधव नेपालले एमालेलाई विभाजन गरी नयाँ दल दर्ता गरेका छन् । नयाँ दलमा एकालेले कारबाही गरेका १४ सांसदले पनि सनाखत गरेका छन् ।

ओलीले रिटमा नेकपा एकीकृत समाजवादीको दर्ता प्रक्रिया नै अवैधानिक भएको र उसलाई काम कारवाही गर्नवाटै रोक्न माग समेत रिटमा गरेका छन् ।