काठमाडौं । नेकपा एमालेमा रहेर माधव नेपाल पक्षमा देखिएका प्रदेश २ का दुई सांसद एमालेमै फर्किएका छन् । प्रदेश २ का सांसद सुन्दरबहादुर विश्वकर्मा र सीता गुरुङले नेपालको साथ छाडेर एमालेमै फर्किएका हुन् ।

निर्वाचन आयोगले एमालेबाट विभाजित भई बनेको नेकपा एकीकृत समाजवादीमा रहेकाहरुलाई सनाखत गर्न आह्वान गरे पनि दुई सांसदले पुनः एमालेमै रहने भएका हुन् ।

सनाखतका लागि निर्वाचन आयोगको गरेको आह्वानअनुसार प्रदेश २ बाट एकीकृत समाजवादीमा १० जनाको सनाखत भएको छ । माधव नेपाल नेतृत्वको समाजवादीले प्रदेश २ मा आफ्नो १३ सांसद रहेको दाबी गर्दै आएको थियो ।

एमाले सांसद डिल्लीप्रसाद उप्रेती उपचारका लागि भारत गएका कारण सनाखतका लागि उपस्थित हुन नसकेको एकीकृत समाजवादीले जनाएको छ ।