काठमाडौँ । अफगानिस्तानबाट अमेरिकी सैनिक फिर्ता भएसँगै पञ्जशीरबाहेक पूरै देशमा तालिवानले कब्जा जमाएको छ । गत १५ अगस्टमा तत्कालीन अफगानी राष्ट्रपति अशरफ घानीले देश छाडेसँगै तालिवान तीव्र गतिमा राजधानी काबुल प्रवेश गरेका थिए ।

देश छाडेर जानु २३ दिनअघि तत्कालीन राष्ट्रपति घानीले अमेरिकी राष्ट्रपति जो बाइडेनलाई फोन गरी सहयोग मागेका थिए । उनीहरूबीच १४ मिनेट कुरा भएको समाचार संस्था रोयटर्सले जनाएको छ ।

रोयटर्सका अनुसार गत २३ जुलाईमा अमेरिकी राष्ट्रपति बाइडेन र घानीबीच फोन वार्ता भएको हो । फोनमा बाइडेनले घानीसँग अफगानी सरकारले तालिवानको गतिविधि रोक्ने योजना माग गरेका थिए । बाइडेनले भनेका थिए, ‘तालिवानलाई रोक्ने तपाईको योजना के छ, त्यसपछि हामी सहयोग पठाउँछौँ ।’

मद्दत गर्न चाहन्थे बाइडेन

रोयटर्सको रिपोर्टअनुसार राष्ट्रपति बाइडेन चाहन्थे कि अफगानिस्तानका सेना प्रमुख जनरल बिस्मिल्लाहलाई तालिवानविरूद्ध लड्ने जिम्मेवारी होस् । फोन वार्तामा उनले अफगानिस्तानका सेनालाई सहयोग गर्न सक्दो कोशिश गरेको बताएका छन् । वार्ताका क्रममा घानीले पाकिस्तानका विषयलाई लिएरसमेत बाइडेनसँग कुरा गरेका थिए ।

घानीले भनेका थिए, ‘पाकिस्तानले आफ्नो १० देखि १५ हजार युवा तालिवानलाई सहयोग गर्न पठाएका छन्, उनीहरू अफगानिस्तानमा तालिवानको तर्फबाट युद्ध गरिरहेका छन्, यसपटक तालिवानले पूरै शक्ति प्रयोग गरी हमला गरिरहेका छन् ।’

रोयटर्सले अमेरिकी राष्ट्रपति कार्यालय ह्वाइट हाउस तथा घानीसँग फोन वार्ताको विषयमा कुरा गर्न खोजे पनि दुईतर्फबाट कुनै भनाई आएको छैन । एजेन्सी