काठमाडौँ । भारतमा अहिलेसम्म कोरोना भाइरस (कोभिड–१९) विरुद्ध करिब ६८ करोडले खोप लगाएका छन् । सरकारी अधिकारीले शनिबार दिएको जानकारीअनुसार ६७ करोड ७२ लाख ११ हजार २०५ जनाले अहिलेसम्म खोप लगाएका हुन् ।

तीमध्ये ५८ लाख ८५ हजार जनाले पछिल्लो २४ घण्टामा मात्रै खोप लगाएको सरकारी अधिकारीले जनाएको छ । खोप लगाएकामध्ये एक करोड तीन लाख ६० हजार २४८ जना स्वास्थ्यकर्मी रहेको केन्द्रीय स्वास्थ्य तथा परिवार कल्याण मन्त्रालयले जनाएको छ ।

त्यसैगरी पछिल्लो एक दिनमा ३६ हजार ३८५ जना कोरोना भाइरसबाट संक्रमण मुक्त भएका छन् । भारतमा अहिले पनि चार लाख पाँच हजार ६८१ जना संक्रमित अवस्थामै रहेका छन् । सक्रिय संक्रमितको संख्या दिनप्रति दिन बढ्दै गइरहेको छ ।

दैनिक नयाँ संक्रमितको संख्याभन्दा दैनिक संक्रमण मुक्त भएकाको संख्या थोरै भएकाले सक्रिय संक्रमित बढेको हो ।

भारतमा पछिल्लो २४ घण्टामा ४२ हजार ६८२ जना नयाँ संक्रमित थपिँदा ३६ हजार ३८५ जना मात्रै संक्रमण मुक्त भएका छन् ।