काठमाडौं । नेकपा (एमाले)का अध्यक्ष केपी शर्मा ओलीले अमेरिकाले दिने भनेको एमसीसीले सरकारले झुक्याएर पास गर्न लागेको दाबी गरेका छन् ।

शनिवार राष्ट्रिय सभागृहमा आयोजना गरेको नेकपा एमालेको काठमाडौं महानगरस्तरीय कार्यकर्ता भेलामा सम्बोधन गर्दै उनले एमसीसी झुक्याएर पास गर्न लागेको हुँदा सत्ता गठनबन्धनका नेताहरु मौन बसेको बताए ।

एमसीसीबारेमा प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’ले केही नबोलेको भन्दै आलोचना गरे । एमसीसी के गर्ने भनेर उनीहरुले बोल्नुपर्ने ओलीको भनाई छ ।

चीनसँग कुनै सीमा विवाद छैन

एमाले अध्यक्ष ओलीले चीनसँग कुनै सीमा विवाद नभएको पनि दाबी गरेका छन् ।

बर्तमान गठबन्धन सरकारले सीमा विवाद अध्ययन समिति बनाएर कसैलाई खुशी पार्न लागेको पनि आरोप लगाए ।

‘यो सरकारलाई चुनौती दिएर भन्न चाहन्छु,’ ओलीले भने,–‘यो समितिले सीमा विवाद देखाओस् ।’ उनले देउवा नेतृत्वको सरकारले भारतसँगको सम्बन्ध पनि बिगार्न खोलेको आरोप लगाए ।

एमाले सरकार नभई मेलम्ची आउँदैन

एमाले अध्यक्ष ओलीले अहिलेको एमालेको सरकार नभई काठमाडौंमा मेलम्चीको पानी नआउने पनि दाबी गरेका छन् ।

मेलम्चीमा बाढीले क्षति गरिसकेपछि आफ्नो नेतृत्वको सरकारले आउँदो वैशाखसम्म पानी ल्याउने तयारी गरिरहेको उनको भनाइ थियो ।

ओलीले आगामी निर्वाचनबाट एमालेले जितेर सरकार बनेपछि मात्रै काठमाडौंमा मेलम्चीको पानी आउने दाबी गरे । एमालेले बाहेकर अरु कसैले मेलम्चीको पानी ल्याउन नसक्ने ओलीको भनाई थियो ।