चितवन । नेपाली कांग्रेस चितवनको सभापति पदका लागि आठ जना मैदानमा उत्रिएका छन् । चितवनमा आगामी असोज १० गते जिल्ला समितिको निर्वाचन हुने तय भएको छ ।

चितवनका हालका जिल्ला सभापति जीतनारायण श्रेष्ठले केन्द्रीय सदस्यका लागि उम्मेदवारी घोषणा गरेपछि जिल्ला नेतृत्वमा ८ जनाले दाबी गरेका छन् ।

कृषि तथा वन विज्ञान विश्वविद्यालयका संस्थापक रजिष्टार प्रा डा सूर्यकान्त घिमिरेदेखि वाग्मती प्रदेशसभा सदस्य मिलनबाबु श्रेष्ठ र पूर्व सांसद जगन्नाथ पौडेलसमेतले जिल्ला सभापतिको दाबी गरेका छन् ।

चितवनका उपसभापति कैलाश कोइराला र सचिव उत्तम जोशी पनि कांग्रेस जिल्ला सभापतिको चुनावी प्रतिष्पर्धामा छन् ।

यस्तै, क्षेत्र नं १ बाट महासमिति सदस्य राजेन्द्र बुर्लाकोटी, क्षेत्र नं २ बाट राजेश्वर खनाल र क्षेत्र नं ३ बाट विजय भुसालले पनि सभापति पदको उम्मेदवारी घोषणा गरेर प्रचार थालेका छन् ।

चितवनमा वडा अधिवेशनबाट दुई हजार ९ सय क्षेत्रीय प्रतिनिधि निर्वाचित हुनेछन् ।

हरेक वडामा सभापतिसहित २७ सदस्यीय कार्य समिति हुनेछ । क्रियाशील सदस्यका आधारमा एउटा वडाबाट १६ देखि ७५ जनासम्म क्षेत्रीय प्रतिनिधि निर्वाचित हुने चितवन कांग्रेसले जनाएको छ ।

नेपाली कांग्रेस जिल्ला समिति चितवनले २७ हजार ८५५ क्रियाशील सदस्य सिफारिस गरेको थियो ।