काठमाडौं । नेपाली कांग्रेसका सहमहामन्त्री प्रकाशशरण महतले मिलेनियम च्यालेन्ज कर्पोरेशन (एमसीसी)को बचाउ गरेका छन् ।

शनिवार काठमाडौंमा आयोजित एक कार्यक्रममा बोल्दै कांग्रेस सहमहामन्त्री महतले एमसीसी सैन्य प्रयोजनको लागि नभएको सम्झौतामा नै उल्लेख भएको दाबी गरे । अन्तर्राष्ट्रिय प्रतिस्पर्धाको आधारमा ठेक्का प्रक्रिया अगाडि बढ्नेसमेत स्पष्ट गरे ।

एमसीसीको सम्बन्धमा नेपाली जनतामाझ उठेको आशंकालाई भने अमेरिकी सरकारले स्पष्ट पारेपछि प्रक्रिया अगाडि बढ्ने उनको भनाइ छ ।

कांग्रेस सहमहामन्त्री महतले एमसीसी विभिन्न सरकारहरुको सहभागितामा टुंगो लागिसकेको विषय भएको पनि बताए ।

नेपाली जनतामाझ उठेका आशंकाहरुलाई स्पष्ट पार्नका लागि सरकारले अमेरिकी सरकार समक्ष पहल गरिराखेको भन्दै महतले अमेरिकी सरकारले यसबारेमा स्पष्ट पार्ने विश्वाससमेत व्यक्त गरे ।

कैयौं सरकारको सहभागितामा टुंगो लागिसकेको विषय भन्दै नेता महतले एमसीसीको बचाउ गरे ।

नेपालले प्राथमिकता तोकेको क्षेत्रमा पैसा आउन लागेको भन्दै उनले अर्थ मन्त्रालयको संयन्त्रले यसको कार्यान्वयन गर्नेसमेत स्पष्ट गरे ।

अन्तर्राष्ट्रिय प्रतिस्पर्धा भएर ठेक्का प्रक्रिया अगाडि बढ्नेसमेत महतले जानकारी दिए । धेरैले नपढेर एमसीसीको विरोध गरेको पनि नेता महतको भनाइ थियो ।