काठमाडौँ । बागमती प्रदेशकी मुख्यमन्त्री अष्टलक्ष्मी शाक्यले मन्त्रिपरिषद् विस्तार गर्ने भएकी छिन् । उनले बुधबार साँझसम्म मन्त्रिपरिषद् विस्तार गर्न लागेकी हुन् । शाक्य मुख्यमन्त्रीमा नियुक्त भएको २१ दिनपछि प्रदेश सरकारलाई पूर्णता दिन लागेकी हुन् ।

शाक्य भदौ २ गते मुख्यमन्त्रीमा नियुक्त भएकी थिइन् । मुख्यमन्त्री भएलगत्तै शाक्यले २ जना मन्त्री नियुक्त गरेकी थिइन् । तर २ जना मन्त्रीमध्ये सामाजिक विकास मन्त्री कृष्णप्रसाद खनालले माधव नेपाल नेतृत्वको पार्टीमा सनाखत गरी मन्त्रीबाट राजीनामा दिएका थिए । केशव राज पाण्डेले आन्तरिक मामिला तथा कानुन र भौतिक पूर्वाधार विकास मन्त्रालय सम्हाल्दै आएका छन् ।

अन्य मन्त्रालय मुख्यमन्त्री शाक्यले सम्हाल्दै आएकी छन् । आफूले सम्हाल्दै आएका मन्त्रालयमा उनले मन्त्री नियुक्त गर्न लागेकी हुन् । मुख्यमन्त्री शाक्यले आज ५ जना मन्त्री र ४ जना राज्यमन्त्री नियुक्त गर्ने नेकपा एमाले बागमती प्रदेशका प्रमुख सचेतक दिपक निरौलाले जानकारी दिए ।

एमाले विभाजन भएपछि मुख्यमन्त्री शाक्यको सरकार अल्पमतमा परेको छ । शाक्यले मुख्यमन्त्रीबाट राजीनामा नदिएर प्रदेश सभामा विश्वासको मत लिने बताइएको छ ।